Corpus Van Reenen-Mulder (CRM14): Oorkonde H536r34501

WJE boudene tkint . gillis die dappere . Jan vromond . Gillis van scoonhille . Jan nerinc . Gillis van + den damme ende Jan f_ Jans f_ wout_s scepenen int ambocht van orscamp doen te wetene allen den gonen die dese lett_e zullen sien jof horen lesen dat quamen vor ons als vor scepenen boudene f_ Jans f_ wout_s en_ lisebette zijn wijf ende willem f_ lamsins willijns en_ kateline zijn wijf en_ gauen halm ende wettelike ghifte alaerde wieghen scouents bouf van + den beggaerden in brugghe van viere ymeten viere roeden min lands lichtelike meer iof lichtelike min ligghende binnen der prochien van orscamp en_ binnen den ambochte van orscamp in ene Jeghenode die men heet beuerhout en_ daer o_metrent t_ stede daer willem de moor wilen woende . en_ dats te wetene dat dese vors_ boudene Jans sone wout_s sone en_ lisebette zijn wijf en_ willem f_ lamsins willijns en_ kateline zijn wijf wedden desen vors_ alaerde wieghen scouents bouf van + den beggaerden in brugghe al dit vors_ land vri land en_ quite land met elleuene peneghen parisisen siaers dier hute gaen te renten . en_ met ziere recht_ landscout te wetten te waerne tseghen elken mensche skouents vors_ vrien eyghindoeme nv en_ ewelike sonder fute en_ enich malengien . Jn kennessen van allen desen vors_ dinghen dat si also gheuaren sijn als hier voren ghescreuen staet hebben wie vors_ scepenen desen tsaert_e ghezeghelt met onsen zeglen vtehanghende . Dit was ghedaen int Jaer ons heren als me_ screef dusentich drie hondert viertich ende viere tsondaghes vor onser vrouwen dach ter lichtmesse .