Corpus Van Reenen-Mulder (CRM14): Oorkonde H536r34502

WJE hughe de rode jan van leden lamsin aloud willem de muenc bouden scotte pieter beste en_ jan tergoed scepene_ van den zieselschen doen te wetene allen den gone_ die deze lett_e zullen zien jof hore_ lezen dat cam voer ons als voer scepene_ jan aelgoet en_ marie zijn wijf en_ gaven alme en_ wetteleke ghifte paridane van den ecoute als te kateline_ ramons bouf drye ymete lands lettel min af meer ligghende bin + den ambouchte van den zieselschen in de proychie van odelem te wullare dat es te wetene in de ofstede daer jan aelgoet en_ zij marie zijn wijf vors_ in wonende zijn ligghende tusche lamsins cocs weduwe lande af een zyde en_ jans weduwen lande van der molen af an~der zyde ende jan aelgoet en_ marie zijn wijf vorzeyt wedden paridane van de ecoute vors_ dit vorzeyde land te wette te waerne vry en_ quite teghe_ elcke_ mensche met ziere rechter land~scout als te kateline_ ramons vors_ vryen heyghindomme En_ kateline ramons vors_ gheft weder janne aelgote en_ marien zine_ wijfve vorzeyt dit vorzeyde land omme een hoed taerwen elcs jaers binne vier penne parisyssce . de beste die men zal bringhen te brugghe in den braambeerch te cope te gheldene te sinte alre helech + messe erst comen sal den beggherden in brugghe en_ dierghelike van jare te jare al~zo langhe als kateline ramons vors_ leven sal en_ als kateline ramons vorzeyt comen zal wesen van lijfve ter doet danne zal die vorzeyde hoet taerwe_ quite wesen en_ dit vorzeyde land zal weder kere_ vp janne aelgote en_ vp marien zijn wijf vors_ jof vp naeste wetteleec huere dat naer em~leden comen zal jn kenlecheden dat wye scepenen willen dat deze dinghe_ bliven vast en_ ghestade zo ebben wy deze lett_e ghezeghelt met onzen zeghelen huut~anghende Djt was ghedaen tsaterdaghes jnt huut~gaende van wuedemaent jnt jaer ons h_en als men screef zijn incarnatioen duzentich drye ondert en_ vijfve en_ viertich (onleesbaar)