Corpus Van Reenen-Mulder (CRM14): Oorkonde H536r34901

Wie , Jhan Ghepaerd , Heinric Moenat , Robrecht die Damhoudere , Karstiaen van den Berghe , Philips van den Poelen , Willem van der Wase , Heinric Zosbrood , Jhan filius Boidius Bondolfs ende Willem , filius Willems , scepene van den Vrijen , doen te wetene allen den ghenen die dese letteren zullen zien jof horen lesen , dat camen voor ons Jhan , filius Gillis Stenemans ende Kateline sijn wijf , ende gaven wettelike ghifte Jhanne , filius mijns here Philps van Ghistele , van viere gemeten ende twee linen lands lettel min jof meer , legghende binden ambochte van Ghistele ende binder prochye van Zevencote , nordwest van der kerke , nordwaerdende den vliet , daer of leghets tien linen lands lettel min jof meer tusschen Jhan , filius Robrechts lande of een side ende Gillis , filius Jhans Waeijs lande of ander side , vord leghets een ghemet lands lettel min jof meer an die zuudside van desen tien linen lands vorseid , streckende toten vliete , ende vord so leghets van den vorseiden lande een vierendeel ghemeets lands , lettel min jof meer tusschen Gillis , filius Jhans Waeijs lande op een side ende Maroyen , filius Robrecht Boots lande of ander side . ende Jhan , filius Gillis Stenemans ende Kateline sijn wijf vorseid , wedden Jhanne , filius mijns here Philips van Ghistele vorseid al dit vorseide land alsoot vorseide es , te wetten , te waerne wech ende land , quite land , vrij land met siere rechten landscult , al datter vorseid es te Jhan , filius mijns here Philips van Ghistele vorseid , vrijen eghindome jeghen elken menschen . In kennissen der waerheden van desen vorseiden dinghen dat sie zeker , vast , ghestade ende wel ghehouden zullen bliven , so hebben wie , vorseide scepenen , dese letteren ghezeghelt met onsen zeghelen utehanghende . dit was ghedaen Dinxendaghes voor sinte Nicholaus dach int jaer ons heren , als men screef sijn incarnatioen dusentech drie hondert neghene ende viertich .