Corpus Van Reenen-Mulder (CRM14): Oorkonde H536r35301

WJE Jan vromond / Jan nerinC / Jan gheraerd / jan bloemaerd / jan roseboem / jan jocep / en_ willem lotin / Scepen_ jnt ambocht van Oerscamp Doen te wetene allen den gonen die desen tsaertre zullen zien jof horen lesen / dat Cam voer ons als voer Scepen_ / broeder jan van beuerhout portre jn brugghe / en_ gaf halme ende wetteleke ghifte / broeder woutren van Oerscamp portre jn brugghe meester van den begaerden jn brugghe voorseid / tscouents bouf van den begaerden voors_ / van eere line lands en_ zeuentiene roeden lands bachte boudins van beuerhout vp de hoghebloct / jn beuerhoutacker / Noch vp wulvoerd / endende vp die merchs / eene line lands en_ zeuen roeden lands / Noch vp vossin~hoet / eene line lands en_ neghentiene roeden lands / Noch vp langheaerd / twe linen lands jn aertheemacker / Noch vp den winkelpit eene halue line lands / en_ Noch vp veltacker / zesse ende zeuentich roeden lands al lichtelike min jof mer / ligghende jn die prochie van Oerscamp en_ binnen den ambochte van Oerscamp voorseid / en_ jn die steden die hier voerscreuen staen / Ende broeder jan van beuerhout portre jn brugghe voors_ / wedde broeder woutren voors_ tscouents bouf van den begaerden jn brugghe voors_ / al dit voors_ land te wetten te ghewaerne jegen elken mensche vri land ende quite land met sire rechter landscoud sonder fute en_ enighen malengien / Ende jn orconschepen dat al dese ghiften weddinghen en_ voerwoerden also gheuaren zijn als sie hier voerscreuen staen / ende bliuen zullen ghehouden zeker vast en_ ghestade sonder fute en_ enighen malengien / So hebben wie Scepen_ voors_ desen tsaerter te kennessen gheseghelt met onsen zeghelen vuthanghende / Dit was ghedaen jnt jaer ons heren als men screef / dusentich drie hondert twe en_ vichtich / vp den viertiensten dach van sporkele