Corpus Van Reenen-Mulder (CRM14): Oorkonde H536r35302

WJE jan vromond / jan nerinc / jan gheraerd / jan bloemaerd / jan roseboem / jan jocep / en_ willem lotin / Scepen_ jnt ambocht van Oerscamp / Doen te wetene allen den gonen die desen tsaerter zullen zien jof horen lesen / dat cam voer ons als voer Scepen_ / kateline de wedewe boudin f_ ysentruden / en_ gaf halme en_ wetteleke ghifte broeder janne van beuerhout portre jn brugghe / van twen linen lands vp langheaerd / Noch eene halue line lands vp winkelpit / ende Noch zesse ende zeuentich roeden lands vp veltacker / ligghende jn die prochie van Oerscamp en_ binnen den ambochte van Oerscamp voorseid jn aercheem~acker / twelke voorseide land / kateline voors_ houdende was jn bindinghen jeghen de aeldinghe boudin f_ ysentruden die hare man was / Ende kateline de wedewe boudin f_ ysentruden voors_ wedde broeder janne van beuerhout portre jn brugghe voorseid al dit voors_ land te wetten te ghewaerne jeghen elken mensche vri en_ quite / Omme twe peneghe parisise elcx jaers also langhe als kateline voors_ leuen sal ouer hare bidinghe / te ghelde te Sente baues + messe binnen elken jare voors_ / ende voerd met sire rechter landscoud sonder fute en_ enighen malengien / Ende jn orconscepen dat alle dese voors_ ghiften weddinghen en_ voerwaerden also gheuaren sijn als sie hier voerscreuen staen en_ bliuen zullen ghehouden zeker vast en_ ghestade sonder fute en_ enighen malengien / So hebben wie Scepen_ voors_ desen tsaerter te kennessen gheseghelt met onsen zeghelen wthanghende / Dit was ghedaen jnt jaer ons heren als men screef / dusentich drie hondert twe ende vichtich / vp den viertiensten dach van sporkele - - -