Corpus Van Reenen-Mulder (CRM14): Oorkonde H536r35401

WJE jan vromond / jan nerinc / jan gheraerd / jan roseboem / wouter f_ Clais smets / jan jocep en_ willem lotin / Scepen_ jnt ambocht van Oerscamp doen te wetene allen den gonen die desen tsaerter zullen zien jof horen lesen / dat Camen voor ons jan colpard de zeisenmakere en_ Margriete sijn wijf / en_ gauen halme ende wetteleke ghifte / broeder janne van beuerhout den begaerd portre jn brugghe / van den vichtendeele van twe ende twintich jmeten lands onder~land en_ merchs~land lichteleke mer jof min / ende tvichtendeel van allen den huse en_ van allen den bomen die staen vp dit voorseide land bede eerd~vast en_ naghel~vast / ligghende en_ staende jn die prochie van Oerscamp / ende binnen den ambochte van Oerscamp voorseid / jn eene jeghenode die men heet ten moere / en_ daer ommetrent twelke voorseide goet wilen was Carstiaens van der goote seluersmets / Ende jan colpard en_ margriete sijn wijf voorseide / wedden broeder janne van beuerhout voorseid / al dit voorseide land en_ merchs~land / ende alle dese voorseide Cateilen te wetten te ghewaerne jeghen elken mensche vri land en_ quite land met sire rechter landscoud sonder fute en_ enighen malengien / Jn kennessen van desen dinghen hebben wie Scepenen voorseide desen tsaerter te kennessen gheseghelt met onsen zeghelen vuthanghende / Dit was ghedaen jnt jaer ons heren als men screef / Dusentich drie hondert drie en_ vichtich vp den tiensten dach van sporkele - - -