Corpus Van Reenen-Mulder (CRM14): Oorkonde H536r35601

WJE jan vromond / jan nerinc / Carstiaen f_ carstiaens heinemans / Michiel harinc / jan de deken / wouter de coninc / ende heinric egbrecht / Scepen_ jnt ambocht van Oerscamp jn dien tiden dat dese dinghen voor ons waren ghedaen / Doen te wetene allen den gonen die desen tsaerter zullen zien jof horen lesen / dat Cam voor ons broeder wouter van Oerscamp de becgard / en_ gaf halme en_ wetteleke ghifte / Michiele den clerc skouents bouf van den becgaerden jn brugghe van den rechten vichten~dele van vijf schelen groten elcx jaers erueleker renten euweleke en_ erueleke ghedurende / te gheldene ten twen paymenten binnen elken jare voorseid Dats te wetene de eene helt van desen voorseiden peneghen te meye voor de note van den oeste / en_ de ander helt van desen peneghen te gheldene te Sinte baues messe naer der note van den oeste binnen elken jare voorseid / en_ also voord te gheldene van jare te jare euweleke en_ erueleke ghedurende / ende te desen voors_ daghen elx jaers / Ende dese voorseide stede / en_ dese voorseide hofstede die es groot / twe linen lands lichteleke mer jof min / Ende Noch jn verbeternessen van deser voorseider erueleker renten vp twe linen lands vp de houcstrate Noch vp eene line lands vp pudebroucker~acker Noch vp eene line lands jnt alout Noch vp een vierendeel jmets lands vp den hoolen wech an die oestside van benevoord en_ Noch vp eene line en_ viue en_ twintich roeden lands vp de bwent bewesten der muelen ten moere / ligghende jn die prochie van Oerscamp en_ binne_ den ambochte van Oerscamp voorseid / en_ jn die steden die hier voorscreuen staen Ende broeder wouter voors_ wedde michiele voorseid Skouents bouf voorseid / al dese voorseide erueleke rente vp desen voorseiden gront te wetten te ghewaerne jeghen elken mensche vri en_ quite sonder fute en_ enighen malengien Jn kennessen van desen dinghen hebben wie Scepen_ voor_ desen tsaerter te kennessen gheseghelt met onsen zeghelen vuthanghende / Dit was ghedaen jnt jaer ons heren als men screef / Dusentich drie hondert zesse en_ vichtich vp den neghene en_ twintichsten dach van october - -