Corpus Van Reenen-Mulder (CRM14): Oorkonde H536r36002

Wie Bourghmeest_s Scep_n Raed ende al de ghemeente van der poort van den dam_e . Doen te weitene ende maken cond allen lieden dat midz den consente ende octroye dat ons de steide van brucghe ghedaens heeft ene sluus te makene vp onse aeruachtichede ende bin onser voors_ poort bachten onser halle ten dam_e x . voeten wijt lopende vten nieuwen ghedelue tote in de kille bachten vleeschure dewelke sluus de speyhoudere van brucghe die nu es jof weizen zal / verwaren sal en_ hopen doen ende laten twater scieten ende weider sluten alst hem goed ende pourfitelijc dinken sal / wij kennen ende verlyen dat de steide van brucghe ons gheconsenteirt heeft de voors_ sluus te makene tonsen costen ende tharen weiderroupene / Ende wedden ende belouen in goeder trauwen dat tallen tijden alst der steide van brucghe ghelieft de voors_ sluus te nieuten ghedaen te hebbene / dat wij + se sonder delay te nieuten doen sullen ende den dijc ghehaefdich maken tonsen costen zonder delay ende zonder enich weidersecghen . Bi der orconscepen van desen l_ren beseghelt metten groten seghele van banden van onser voors_ poort vuthanghende . dit was ghedaen vp den viere ende twintechsten dach van octobre jnt jaer ons he_en M . + CCC ende tsestich -