Corpus Van Reenen-Mulder (CRM14): Oorkonde H536r36401

WIE gillis van houtviuere gillis van hoonbuerch symoen van beuerout _iaan f_ _iaans f_ heynmans Michiel de deken jan de mast ende jan f_ wouters . Schepen_ vpt ambocht van oorsca_p jn dien tiden dat dese dinghen voor ons waren ghedaen doen te wetene allen den ghonen die desen tshaert_e sullen zien jof horen lesen dat cam voor ons alse voor schepen_ voors_ pieter van tielt ende ghaf halme ende wettelike ghifte janne den nayere tscouents bouf van + den beggaerden in brugghe van enen + ymete ende dartiene roeden lands lichtelijc meer jof min ligghende bin + den ambochte ende in + de prochie van oorscamp an + de oostside van + der leye van welken voorseiden lande dats leghet een half ymet ende drie roeden lands lichtelijc meer jof min besuden den houden~moortere neven der weduwen gillis maertins lande af een side ende der kindere boudins woutersoets soens lande af ander side voord so leghets van desen voorseide_ lande een half ymet ende tien roeden lands lichtelijc meer jof min vp den hackemoort_e neven der beggaerden voorseid lande af een side ende gillis doedins lande af ander side Ende pieter van tielt voorseid wedde janne den nayere tscouents bouf van + den beggaerden voors_ dat voorseide land ligghende ten steden voors_ te wetten te waerne ende te warandeerne vry land ende qwite land met sire rechter lansculd tscouents van + den beggaerden voorseid vryen heghendomme jeghen elken meinsche sonde fute fraude ende enich malengien . jn kennessen van desen dinghen hebben wie schepen_ voorseid tshaert_e te kennessen gheseghelt met onsen zeghelen huithanghende dit was ghedaen int jaer ons heren als me_ screef sijn incarnacioen dusentich drie + hondert drie ende sestich vp den sestiensten dach in maert