Corpus Van Reenen-Mulder (CRM14): Oorkonde H536r37201

WJE . Michiel van assenede en_ . jan de muntre scepe_ Jn brucghe in dien tiden doen te wetene allen lieden dat Camen voor ons als voor scepenen . Joncvrauwe ysoye sher jans osts weduwe ouer hare zeluen af ene zide ende Joncvrauwe Jaquemine zwijns ouer hare zeluen af ander zide Ende kenneden dat zij onderlinghe ene vriendelike voorwoorde ghemaect hebben als van enen huus staende ten damme an de maerct twelke wilen was . pieters . walkers van + den~welken huus de drie vierendelen toebehoren der voors_ joncvrauwe ysoyen ende tvierde vierendeel der voorseider Joncvrauwe Jaqueminen Jn deser mani_en dat Joncvrauwe Jaquemine voors_ dit voorsede ghehele huus zal moghen besitten verhueren al te haren meesten proffite ende de ghehele huere ontfanghen te haren vryen eghindomme zonder enich empechement van + der voorseider joncvrauwe hosts . van + den dertienste_ daghe van pietmaend naest comme_de een jaer lanc daer naer eerst commende ghedurende ende tvoorseide jaer verleden . dat daer + naer de voors_ Joncvrauwe hosts tvoorseide huus der ghelike zal moghen besitten ende verhueren gheheel te haren vryen eghindomme drie jaren ende twalef daghen lanc daer naer eerst commende zonder empechement van + der voorseider joncvrauwe jaqueminen Altoos behouden dat zij ghemene sculdich zijn thuus gheaefdich te houdene landchens ende last te helpene betaelne . jn zo wies houden ende jaerscaren dat het ware dats te wetene elc van zinen auenante dat hi an thuus heuet Ende beloueden an beden ziden elc andren dese voorseide voorwoorde . (onleesbaar) te doene ghebrukene ende te wetten te waerne Jeghen coop versteruenessen ende alle andre voorwoorden ende elc andren last te helpen draghene van den voors_ huus gheaefdich te houdene ende van dattere jaerlijx vte + gaed te betaelne also voorseidt es de voorseide viere jaren ghedurende . jn kenness_ van desen dinghen hebben wij scepenen voorseid . dese l_ren huuthanghende beseghelt met ons_ seglen dit was ghedaen . jnt jaer M . + ccc . + twee ende tseuentich vp den tienste_ dach van pietmaend