Corpus Van Reenen-Mulder (CRM14): Oorkonde H536r39101

Jc simoen van bruggheda_me ruddere capitain van der Sluus doe te wetene allen lieden dat jc ontfanghe_ hebbe van pieter adoren en_ van pieter den heict doe ten tide_ tresoriers van der stede van brugghe de so_me va_ . viere + . hondert pond par_ ouds ghelts maken in niewen ghelde . drie + . ende twintich pond . tiene . scellinghe en_ . zeuen . pene gro_ dewelke vors_ so_me van ghelde mi de vorseide stede consenteerde en_ ghaf van dat jc te brugghe binne_ lach als capitein voor den tijt dat brugghe verlore_ was Ende van dat jc toudenaerde lach met dien van brugghe als haerlieder capitein ten tiden als brugghe verlore_ was Van welker vorseider so_me van ghelde jc mi wel ghepayt houde en_ voord van allen heesche en_ calainge tote den daghe van heden en_ scelde daer of quite den vorseiden tresor_s in de name van der vorseider stede ende allen andren jn kennessen der waerhede_ dese l_re bezeghelt met minen zeghele vuthanghende ghedaen jnt jaer ons heeren . M . + CCC . + een . + en_ tneghentich vp den . xxxste_ . dach in maerte