Corpus Van Reenen-Mulder (CRM14): Oorkonde H536r39701

Wie jacob Mulaerd Ende thomaes van + den hogheweghe Scepenen . Jn brucghe in dien tiden dat dese dinghen voor ons waren ghedaen doen te wetene allen lieden dat Cam voor ons als voor scepen_ Maertin van varsenare de lootghietre kende en_ verlijede dat hi ontfanghen heift van + den her niclais baerbesane ? ? janne bouts den houden betalende in de name van + der stede van brucghe twalef ponden vichtien sceleghen en_ tien peneghen groter tornoisen dats te wetene van + den cope van zesse waghen en_ zesse en_ dartich naghel bloc + loots te elleuen sceleghen de waghe jtem van viere en_ vichtich waghen en_ vichtien naghel bloc + loots te verghieten van elker waghe vichtiene grote jtem van hondert en_ twintich pond sauduren van elken ponte twee grote ghebesicht an + de niewe speye ten da_me jtem van weerke bi hem ghedaen met tween lootghieters en_ met tween handcnapen van neghen en_ twintich daghen elke lootghietere tien grote sdaghes en_ elken handcnape viue grote sdaghes jtem van dat tvors_ loot coste van brucghe te da_me te voerne achte sceleghen en_ viere peneghen grote torn_ Ende van Roete van houte en_ van thueruen elleuen sceleghen en_ viere peneghen grot_ torn_ Van welken vors_ twalef ponden vichtien sceleghen en_ tien peneghen grot_ torn_ Maertin van varsenare vors_ hem aldaer wel vernoucht en_ ghepaeit hild ende de vors_ stede van brucghe den her niclaise baerbesaen janne bouts den houden en_ hem allen wien datt_ quitancie af toebehoord der of quite scalt jn kennessen van desen dinghen so hebben wie scepen_ vors_ dese l_ren huuthanghende bezeghelt met onsen zeghelen dit was ghedaen jnt jaer . M . + ccc + . zesse en_ tneghentich vpten . zeuensten dach van sporkele -