Corpus Van Reenen-Mulder (CRM14): Oorkonde I049p36301

Wj scepenen ende burghemeysters van zierixe / doen kont allen luden die desen brief zullen zien jof horen lesen / Dat dieric poppen sone / ende pieter jans sone onse porters machtich ghemaecht siin van den meest_en van den scepen / van den reeders / ende van den scipmans weghen / als dat si varen zullen an den coninc van denemarken ende an pieter niclays sone om_e te dadinghe met pieter niclaus sone van ziins broeder doot / En_ soe wes dat dieric en_ pieter vornoemd daer jn doen / dat zullen alle die meesters . reeders . et scipmanne vorscr_ vast en_ ghestade houden sonder enich wederzegghen / vort soe beuelen wi scepen_ ende burghemeyst_en vorscr_ ende ghebieden narenstelike allen den ghenen en_ eenen yegheliken besonder die buten dunen ter zee waerd varen met coemanscepe . Dat si dierike ende piet_e vornoemd ghehoersamich en_ onderdanich siin / soe waer en_ dat sijs te doene hebben / het si jn den nortsunt jof elwaer / en_ dat si daer bi hem / + bliuen en_ hem te bate comen en_ bi~staen . met liue . met goede . met rade . en_ met dade / soe waenneer dat sijs van hem vermaent worde / Ende dat en wilt niet laten jn gheenre manieren / En_ soe wie des niet en dede / dat souden wi houden aen ziin liif / en_ aen ziin goed / als aen den ghene_ die die stede van zier_ meenden te bederuen / en_ dese beueelnesse sal gheduren tote onsen wederzegghen Jn kennessen der waerheyt hebben wi desen brief open bezeghelt met onsen ghemeenen port zeghele ghegheuen op~ten zeuenden dach der maent van aprel jnt jaer ons h_en M˚ ccc˚ drie en_ tsestich - - - - -