Corpus Van Reenen-Mulder (CRM14): Oorkonde I049p36303

Wj scepenen en_ burghemeysters van zier_ doen cont allen luden die desen brief zullen zien jof horen lesen Dat wi bi versoeke ende bi eenen verwilcoren van den meesten hoope van den meesteren van den scepen / van den reeders en_ van den scipmannen . om_e die beste oerbare / en_ te verhoedene die meere scade diere of comen mochte / bi ghemeenen rade en_ _sente van scepen_ en_ van burghemeyst_en gheordineert en_ gheset hebben een pont~ghelt op allen den ghenen die buten dunen / ter zee waerd varen met coemanscepen jn alsulker manieren als hier na ghescreuen staet Jn den eersten dat elc meester van een scepe van elker reysen van den hoostalle gheuen sal van elken pont g_te eenen g_ten / En_ elc scipman van elker reysen die hi doet van siere voeringhe eenen g_ten . Vort van eenen yegheliken van onsen port_en sal gheuen van elker last scoensharinx die men op die scoensche reyse maken sal eenen ouden g_ten / Ende waerd dat yement van buten onder onsen voghet op scoenre land quame ligghen en_ harinc makede die soude gheuen van elker last harinx eenen ouden groten gheliken onsen port_en / En_ dese oerdinancie sal wesen altoes op verbet_en van scepen_ en_ van burghmeyst_en / en_ gheduren sonder arghelist tote haren wederzegghen / vort soe zullen verbonden wesen jn deser oerdinancie en_ jn deser settinghe van desen vorseiden pont~ghelde alle die ghene die buten dunen ter zee waert varen met coemanscepe / En_ al haer goed dat si jn hare scepen wech~/voeren ende wederbringhen sonder arghelist / En_ dat oech verbonden zullen wesen alle die meest_s / reeders / en_ scipmanne alsoe wel die hier nv ter tijt niet thuys en siin / als diere thuys siin : vord soe maken wi hem machtich met desen brieue dat si goede knapen daer toe setten moghen die dit vorseide pont~ghelt jn~nemen en_ ontfanghen van allen den ghenen diet sculdich siin te gheuen met een rechte alsoe alst hier voren gheoerdineert en_ gheset es / En_ waerd dat enich meester reeder jof scipman dit vorseide pont~ghelt niet betalen en wilde als vorscr_ es / soe soude de scoutate ghaen metten scepenen tote sinen ghereetsten goede dat hi hadde / en_ hem daer of panden alsoe veel ghelds als siin pont~ghelt beliepe / En_ danne souden si den ghenen alsoe corrigeren ende hem alsoe doen ontghelden / als dat hem efter een ander hoeden mochte Jn kennessen der waerheit hebben wi desen brief open bezeghelt met onsen ghemeenen port~zeghele ghegheuen op ten zeuenden dach der maent van april . jnt jaer ons h_en M˚ ccc˚ drie en_ tsestich - - - - -