Corpus Van Reenen-Mulder (CRM14): Oorkonde I081p33801

Wj Katheline clays dochter . Auezoete Aernouds dochter . Ende sensie piet_s dochter meestersen van den beghinehoue jn middelburgh . Maken kond allen luden . dat wi bi ghemeenen rade van den ouden joncfrouwen van den houe vorseyt vercocht hebben eersamen luden ende wisen den abd en_ den conuente van onser vrouwen cloister jn middelb_ een huus staende an die nortzide van der kerken jnt beghinehof vors_ dat gheheeten es joncfrouwe magriete meeus dochter huus . haer wullenwerc jn te hantierne ende te werkene . o_me viue ende twintich scellinghe grot_ tornoyse . die ons die abd en_ tconuent vorseyt wel betaelt hebben . Ende jn dit vorseyde huus zal die abd vorscreuen . jof die ghene dien hijt beuelt eene joncfr_ zetten van binnen den houe die hi wille en_ die hem die meestersen van den houe raden . Ende zo wat joncfrouwen die abd ende die meest_sen vorseyt ouer~een~draghen daer jn te zettene . die zulle_ die meest_sen zelue daer jn zetten . ende die joncfr_ die daer jn ghezet wort als vorscreuen es . die zal met hare also vele helpen als haer behoeft twerc mede te vorderne van joncfrouwen van binnen den houe ende niet van buten . + Ende die joncfrouwen zullen hare die meest_se zetten . Ende dit vorseyde huus ende die joncfrouwen die daer jn wesen zullen zal + men beleeden en_ bezetten ghelike and_en conuents husen jnt beghinehof vorscreuen . Ende alle dese vorseyde vorwaerden zijn ouer~een~ghedraghen o_me ghemeene orbare . en_ zullen wesen zonder arghelist . Jn orkonde desen brieue beseghelt metten ghemeenen zeghele van den houe vorscreuen . Ghegheuen jn middelburgh des zaterdaghes na sente pouwels dach jn den winter / jnt jaer ons h_en . duzent + . drie hondert + . achte ende dertich