Corpus Van Reenen-Mulder (CRM14): Oorkonde I081p34201

Wj pieter jans sone wouter warrin ende hughe braems sone vutfoude van onser vrouwen gasthuse in middelburgh Maken cond allen luden dat wi bi rade ende ghemeen ouer~een~draghen scepenen ende raed van der port van middelburgh . ghemanghelt hebben ieghen den abd ende tghemeene couent van onser vrouwen cloostere in die stede vorseit achte ghemete lands ende een half ghemet . neghene ende twintich roeden min luttel meer of min van des gasthuus lande vornoemt . ligghende bin desen viere ghemarken die wech leghet an die oostzide die abdie an die zuutzide ende an die nortzide ende die gastlude vorscreuen an die westzide . omme viere ghemete lands viertiene roeden min luttel meer of min van der abdien lande vorseit . ligghende bin desen viere ghemarken die gastlude vornoemt ligghen an die oostzide an die zuutzide ende an die westzide ende die wech an die nortzide . welke manghelinghe wi gesproken ende ghemaket hebben van den vorseiden lande met omme ghemet ghelike ende alsoe vele als des gasthuus land vorseit meere es dan der abdien land vornoemt sullen die abd ende tcouent den gasthuse ghelden een ghemet viue en_ vijftich scellinghe grote al tander land om vichtich scellinghe grote elc ghemet waer~of bi den abd vorseit den eersten ende den lesten penninc of betaelt es tote des gasthuus behoef . ende wi vutfoude vornoemt verlien ende ghelouen den abd ende den couente vorscreuen van des gasthuus weghen ende met des gasthuus goede recht warent te wesene tote allen rechte van den vorseiden lande dat wi vermanghelt ende vercocht hebben . jn orconde ende in kennessen der wareit hebben wi vutfoude desen brief bezeghelt met des gasthuus zeghele vorseit ende wi burghemeist_en scepenen ende raed van der port van middelburgh om~dat dese saken toe~comen ende ghemaket zijn bi rade van ons hebben desen brief bezeghelt met onsen ghemeenen port zeghele vuthanghende . dit was ghedaen in den jare ons he_en . M˚ + . C˚CC + . twee ende viertich vp sente odolfs dagh - - -