Corpus Van Reenen-Mulder (CRM14): Oorkonde I125p30801

Wie Jhan f_ Pieters , Jhan f_ Bets , Hughe Winkepau , Hughe die Roec , Hughe Redeward , Gielis van Hulst , Lammeracht Thoen ende Jhan Reinvaerd , scepenen in Ardenburgh te dien tiden dat dese dinghen ghedaen waren , doen te wetene alle den ghenen die dese lettren sullen zien ende horen lesen dat vor ons quam ver Hide , die wedewe Gosin Curloes , wel bedocht van haren vive sinnen ende bi haren goeden wille ende omme die zalichede ende die orbore van haerre ziele ende van haren vorders , ende besette ende band vichtiene pont jaers arveleker ende heuweleker renten , ligghende binnen den scependoeme van Ardenburgh , die~welke vorseide rente leghet in den steden die men hier na nomen sal , dats te wetene te ere capelrien die~welke men besinghen sal hover hare ziele ende haerre vorders in die kerke van Sente Baues in Ardenburgh . Die~welke vorseide rente leghet in die ofstede Imsoete Deckers twaleve scheleghe jaers , in Sanders ofstede van der Hee een ende dertich scheleghe ende viere peneghe jaers , in die ofstede die Jhan f_ Woutermans was twaleve scheleghe jaers , in die ofstede Gielis Tegheldeckers dertiene scheleghe ende drie peneghe jaers , in Jhan Scoelins ofstede dertiene scheleghe ende neghene peneghe jaers , in Boudins Bien ofstede zestiene scheleghe ende neghene peneghe jaers , in Willems Kegs ofstede twintich scheleghe jaers , in Jacob Berlands ofstede zevene scheleghe jaers , in Abboud Plaetsaerds kinder ofstede achte scheleghe jaers , in die ofstede Grielen f_ Willems f_ Amelis zesse scheleghe jaers , in die ofstede Marien Colnaers tiene scheleghe jaers , in twintich mens ofstede achte scheleghe jaers , in Bette Biters ofstede drie scheleghe jaers , in Martins Kints ofstede achte scheleghe jaers , in Auesoete Schelewards ofstede ellevene scheleghe jaers , in Heine Wachters ofstede twaleve scheleghe jaers , in Pouwels Blauoets ofste twaleve scheleghe jaers , in Jhan f_ Gherards ofstede zevene scheleghe jaers , in Jhan Zegards ofstede tiene scheleghe ende achte peneghe jaers , in Imsoeten Jacob Wabekins ofstede zeventiene scheleghe jaers , in Willem Aelrix ofstede zestiene scheleghe jaers , in Hughe Spiis ofstede vive ende twintich peneghe jaers , in Ysaelden Cupers ofstede vichtiene peneghe jaers , in Hughe Blondeels ofstede zesse ende twintich peneghe jaers , in Hughe Kegs ofstede twaleve peneghe jaers , in ver Marien ofstede , die wedewe Pieters f_ Lamsins drie scheleghe ende drie aleghe jaers , in Gielis ofstede van Hulst drie scheleghe , zesse peneghe ende een allinc jaers , in die ofstede Dankards Spierinx zesse scheleghe ende tiene peneghe jaers , in Glorien Blonden ofstede zestiene scheleghe jaers , in Jonghe Willems Sunaerds ofstede viere scheleghe jaers , in ser Heinrix Smeeds scapellaens ofstede drie ende dertich peneghe jaers , in Boudins Hoesels ofstede twe scheleghe ende zesse peneghe jaers , in die ofstede Lammins van den Pitte twe scheleghe ende zesse peneghe jaers . Ende omme~dat wie scepenen in Ardenburgh vornoemt kennen dat dese vorseide ver Hide , die wedewe Gosins Curloes vorseid , alle dese vorseide rente hevet beset ende ghebonden te deser vorseider capelrien boef in Sente Baues kerke van Ardenburgh vornoemt te besinghene hover hare ziele ende haerre vorders ende omme die zalichede ende die orbore van haerre ziele , in kennessen dat ons scepenen vornoemt alle dese vorseide dinghen cont ende kenlic siin + , so hebben wie scepenen vornoemt desen saertre ghezeghelt met onsen zeghelen huut~hanghende . Dit was ghedaen int jaer ons Heren als men screef siin Incarnatioen M˚ CCC˚ ende achte up den donresdach vor sente Dionijs daghe .