Corpus Van Reenen-Mulder (CRM14): Oorkonde I125p31501

Wi Willem Blankaerd , Jan Blondeel , Hughe Bekelin , Pieter Keyaerd , Lamsin Teil , Jan Vernaeghten zone ende Jan Bieze Jacobs zone + , schepenen in Ardenburgh , doen te wetene allen den ghenen die dezen tsaertre zullen zien jof horen lesen dat quam vor ons Willem Buckaerd de clerc ende gaf up alm ende wettelike ghifte den here Lammerechte den Brune capellaen in Zinte Baefs kerke in Ardenburgh van vichthiene ponden jaerliker ende erveliker renten + , ewelike staende there capelrien boef , ewelike ende elcs daeghs te verdienne in Zinte Baefs kerke in Ardenburgh in dezer manieren als hier + na volght . Dats te wetene dat Willem voorseid deze voornoemde vichthiene pond behouden zal te zinen live ende na Willems lijf voorseid , so zoude deze voornoemde vichthiene pond effen ende ontfanghen der Lammerecht de Brune voornoemd also langhe als hi levede , het ne ware dat deze voorseide Willem Buckaerd noemde enen persoon die so varre comen ware dat hi hebbelijc ware deze capelrie te verdienne ende dade als + er thoe behoord . Waer oec dat sake dat Willem voorseid deze persoon niet ne noemde bi znen live te dezer capelrien boef , so wilde Willem voorseid dat zine testamentarise namen enen goeden persoon in hare ziele die hem of der meerre perthien van hemlieden nuttelijxt dochte ter capelrien boeuf voornoemd . Ende dese voornoemde rente leeght in perdcheelen binnen der poort wel bezet : in dofstede daer Hughe Estas up woend an Zinte Jans brugghe zevene ende twintich peneghe tsjaers , in Willem Scapers ofstede een ende viertich peneghe tsjaers , in Gillis Teils ofstede tsouden elleven sceleghe ende thien peneghe tsjaers , in Jan Bollins ofstede tsclercs , dardenalven scellinc ende drie poytevine tsjaers , in Weitin Eps ofstede zesthien sceleghe tsjaers , in Jans Cupers ofstede acht sceleghe tsjaers , in Jan Alards ofstede vijf sceleghe ende vier Peneghe ofstede vichthien sceleghe tsjaers , in joncvrouwe Marien Buccaerds ofstede vier sceleghe acht peneghe ende ander + alven poytevijn , in Pieter Jans zoens ofstede acht sceleghe ende zes peneghe ende tdardendeel van enen penninghe , in Lammerecht Bies ofstede elleven sceleghe , in Pieters Cupers ofstede twee peneghe , in Boudin Scoudeuoeds ofstede vichthien sceleghe tsjaers , in Pieter Ballincs ofstede dard + alf scellinc tsjaers , in Jan Wijngaerds ofstede vijf sceleghe ende zeven peneghe tsjaers , in Jan Tands ofstede thien peneghe ende een allinc ende ander + alven poytevijn , in Wouter Riesebax ofstede , thien peneghe ende een allinc ende ander + alven poytevijn , in Jans ofstede van Hoye twee ende twintich peneghe ende een allinc , in Jacob Reedewaerds ofstede vijf peneghe ende drie poytevine , in + de naeste ofstede Tumelaers drie ende twintich sceleghe ende zeven peneghe ende een alven poytevijn , in Godeuaerds ofstede van Bulioen vichthien sceleghe ende zeven peneghe , in Magrieten Moenc Wulfs zoens ofstede vichthien sceleghe tsjaers , in Jans ofstede van den Steene drie sceleghe ende elleven peneghe , in die naeste ofstede zes sceleghe ende vijf peneghe tsjaers , in Boudins Hazen ofstede thien sceleghe tsjaers in Willems Vedelaers ofstede zes sceleghe ende vier peneghe tsjaers , in Wouters Mesmakers ofstede zes sceleghe ende vier peneghe tsjaers , in Auezoete Reedewaerds ofstede twalef sceleghe ende zeven peneghe tsjaers , in Jan Magrieten zoens ofstede elleven sceleghe ende enen penninc , in Auezoete Quariox ofstede viertich sceleghe tsjaers , in Maerse Teils ofstede achthien sceleghe tsjaers , in Clais Wils ofstede zesthien sceleghe tsjaers , in Pauwels Malins ofstede thien peneghe ende een allinc ende een alven poytevijn , in Pieter Soys ofstede thien peneghe ende een allinc ende een alven poytevijn tsjaers ende in Boudin Caneels ofstede twee ende dartich peneghe tsjaers . Ende al deze voornoemde jaerlike ende ervelike rente ewelike staende so gheloofde Willem Buckard voornoemd dezen voornoemden den here Lammerechte te wette te warendeerne vri ende quite te dezer voornoemder capelrien boef in de zelve maniere als hier voorseid es ende men hier + na nomen zal . Dats te wetene : waer dat sake dat de capellaen die deze capelrie hebben zal na Willems ende ser Lammerechts dood voornoemd , niet ne dade messe elcs daeghs of sufficiantelike dade doen , so wille Willem voorseid dat van elker fauten de capellaen van dezer voornoemder capelrien gave zes peneghe also zulker munten als hi ontfanghen zoude van ziere renten ter kerken boef van Zinte Baefs voornoemd , die~welke zes pene voors_ ontfanghen zullen de kerkemeesters van dezer voors_ kerken ende ter kerken boef , het ne ware dat de voors_ capellaen ziec ware of belet in zine consientie ende in zine ziele met redenliken inpedimente . In kennessen van dezer dinc hebben wi schepenen voornoemd dezen tsaertre bezeghelt met onzen zeghelen uuthanghende dit was ghedaen int jaer ons heren als + men screef M˚ CCC˚ ende vierthiene tsaterdaeghs voor Zinte Vincensis daghe .