Corpus Van Reenen-Mulder (CRM14): Oorkonde I125p31701

Wi Pieter de Vos , Symon Arnouds zone , Jan Poeleuoet , Ghiselin Jans zone ende Willem Boudins zone , late van + den Riselbrieve , doen te wetene allen den ghenen die dezen tsaertre zullen zien jof horen lezen dat quamen voor ons als voor late Weitin Idde ende Magriete , zijn wettelijc wijf , ende gaven wettelike ghifte Pietere Jan Pieters zoens zone van viere linen lands , lichtelijc min of meer , ligghende int Ambocht van Ardenburgh ende in die prochhie van Onzer Vrouwen tusschen Weitin Coppins zoens lande of een zide ende Pieter Ghiselins zoens kinder lande of ander zide , daer Weitin Idde ende Magriete , zijn wettelijc wijf voorseid , up wonen . Ende zij ghelovedse hem te wette te warendeerne wegh ende land , vri land ende quite land , te zinen vrien heeghijndoeme jeghen elken mensche metten rechten erfchenze , dats te wetene met twee peneghen parisisen van + den ymete elx jaers over zijn vri heeghijn goed . Voort so gaf Pieter voorseid dezen voorseiden Weitine ende Magrieten , zinen wetteliken wive , ende hare wetteliken hore deze voorseide vier linen lands , lichtelijc min of meer , therveliken chenze omme twalef sceleghe parisise claekeloos wegh draghens elx jaers , houde grote coninx tornoyse te twel peneghen parisisen jof de warde der of in andren paeiemente te gheldene , dheen elt te medewintre die eerst coemt ende dhander elt te meye die daer naest comen zal , ende also voord ewelike alle de medewintre ende meyen die emmermeer comen zullen . Voort waer oec dat sake dat men van allen landchenze grote tornoyse te tien peneghen ende tallinghen ghemeenlike gave , so zoude Pieter voorseid grote tornoyse te tien peneghen ende tallinghen mede hebben . Voord so zullen Weitin ende Magriete , zijn wettelijc wijf voorseid , ende haer wettelijc hoor ghelden al den erfchens van den voorseiden lande jaerlijx ende al den cost ende al de sculd die + re emmermeer up lopen zal . In kennessen van dezer dinc hebben wi , late vorseid , dezen tsaertre ghezeghelt met onzen zeglen uuthanghende . Dit was ghedaen int jaer ons Heren als men screef M + CCC ende zeventiene tswoensdaeghs voor Zinte Maerx dagh .