Corpus Van Reenen-Mulder (CRM14): Oorkonde I125p38902

Wij wouter bader?n ende Jacop de cupe jans sone scepene jn ardenburch kennen dat Cam voor ons alse voor scepene Joris aelric als burchmeester van den Course binnen der stede van ardenburch jn dien tiden en_ van der voors_ stede weghe Ende begheerde dae? wettelike ghedaen te sine t? al sulke_ goede als hi wettelike ghepant hadde ende te wette_ verboden hadde twelk voors_ goet wilen eer toebehoorde Janne van + den voorde ende sine_ wetteliken wiue jn haerlieder laetste lijf dats te wetene een huus ende al dat den voors_ huse toebehoert van achter tote voren aertuast ende nagheluast staende an die maerct alre~naest der boenghaertstrate_ of een side ende alre~naest der stede weghe of ander side als ouer vijf pont grot_ tornoyse die jan van den voorde ende siin wettelike wijf sculdich bleue_ der stede voors_ tenden haerlieder doot ghelijc alser die tsaert_e van der wetteliker pandinghe en_ die tsaert_e van den w?liken verbode wel of verclaersen mentioen make_ ende jn~hebben toghede ende seyde dat de ghenachte van den wettelike_ verbode verleden waren ende vermat hem dus hulpe ende kennesse (onleesbaar) scepene_ Ende na + den vermete so begheerde hi dat die wettelike scoutate scepen_ maende van + den rechte aldaer so war? scepene ghemaent van + den rechte En_ na der voors_ maninghen so wijsden scepen_ dat sij wilden horen ke_nesse daer vp dat hem Joris aelric als burchmeest_ voors_ wettelike v_mete_ hadde die kennesse ghehoort worden sijs daer tenden ghemaent si sonder Recht of wisen aldaer so kenneden he_ scepen_ siin vermet Ende na der voors_ kennessen so maende die wettelike scoutate scepene van + den rechte Ende na + der maninghen so wijsden scepenen dat me_ Joris aelric als bourchmeest_ van + den course binne_ der stede van ardenburgh ende ter voors_ stede bouf siin hant soude doen slaen an die cricke ende dattene die wettelike scoutate doen soude mett_ cricke ten voors_ goede behouden elken me_sche sine_ rechte Ende aldaer so dedene die wettelike scoutate mett_ cricke ten goede ghelijc dat tvonnesse van scepen_ jn~hadde Sonder fraude of malengien jn kennesse van desen dinghen so hebben wij scepen_ voors_ desen tsaert_e beseghelt met Ons_ seglen huuthanghende dit was ghedaen jnt jaer ons he_en als me_ screef dusentich drie + hondert neghene ende tachtentich vp den tiensten dach van Septemb_