Corpus Van Reenen-Mulder (CRM14): Oorkonde I158p34701

Wi simoen hughe jan vromond symoens zone Ende andries van kercuorde scepenen in west~eclo te dien tiden als dese dinghen waren ghedaen kennen dat vor ons quam als vor scepenen jan neue ende verliede dat hi sculdich es vranken van der moelne twalef scellinghe paresise aerueliker renten elx jaers te gheldene te elken sente baues messe . de~welke vorseide rente es beset up twee ghemete lants ligghende te west~eclo an de grote strate . magriete die wedue uter aerden ende hare kindren an die hoeft~zide ligghende roegiaer dankaert an die west~zide . ende pietren klincaert ligghende ten ende . en_ ute desen vorseiden lande so ne gaet niet dan ander + alf lopiin rox elx jaers te gheldene den hore van den barrendenlare . en_ sgrauen rechte aerfscout . en_ dese vorseide rente . jn kenlicheden der wareden so hebben wi scepenen voreseit dese letteren beseghelt met onsen seghelen hute~hanghenden . Dit was ghedaen int jaer ons heeren als men screef dusentich drie ondert seuene en_ viertich donnerdaghes vor sente vincentius dach