Corpus Van Reenen-Mulder (CRM14): Oorkonde I158p35501

Wij wouter alaerd Roeger dankaerd Ende pieter ter penninc scepenen jn west~Eclo in dien tiden doe dese dinghen waren ghedaen doen te wetene hem allen die dese lettre zullen sien of horen lesen dat quamen voor ons als voor scepenen jan boongherd boidiins zone ende machtilt ziin wetteleke wiif ende hebben ghegheuen wetteleke ghifte fransooise van aarsele van sesse ende dertich scelinghen parisisen siaers aerveleker renten te gheldene telken sente baues messe die comen sal heeuweleke ende aerveleke gheduerende ende es beset ende versekert vp harelieder husinghe ende hofstede ende vp al datter vp staet ende staen sal de~welke hofstede es groot viue ende tneghentich roeden lants lichteleke min of meer ende es ligghende ende staende hoofdende an de strate die men heetet den kercwech streckende hachterwaert tote kleene jan vroumonds lande ende et es ghelant willem remboud an de een zide ende pieter jans zone aleden soens an de ander zide ende jan boongherd voorseit ende ziin voorseide wiif hebben ghelouet fransooise voorseit dese voorseide rente te wette te waerne vri ende quite tieghen elken mensce vp dese voorseide besettinghe met Sgrauen scult vooren hute gaende Ende dese voorseide rente moet bliuen gheldende cost ende last metter stede van west~Eclo in also velen als zoe sculdich es te gheldene Ende alle dese dinghen ziin ghedaen wetteleke bi consente van beeden paertien na costume ende husage van der kuere van west~Eclo jn kennessen der wareden so hebben wij scepenen voorseit dese lettre_ beseghelt met onsen zeghelen hute~anghende Dit was ghedaen jnt jaer ons heeren als men screef dusentich drie hondert viue ende vichtich vp sente niclaus dach -