Corpus Van Reenen-Mulder (CRM14): Oorkonde I158p35901

Wij Rase van brakele gheeraerd bouden lammerechts zone Ende pieter terpenninc scepenen jn west~Eclo in dien tiden als dese dinghen waren ghedaen doen te wetene hem allen die desen tsaertre zullen zien of horen lesen dat quamen voor ons als voor scepenen joos van den doorne ende adelice ziin wetteleke wiif ende hebben ghegheuen wetteleke ghifte lamsine vr?de van twaliue scelinghen parisisen siaers aerveleker renten te gheldene elkes siaers telken sente bamesse eeweleke ende aerveleke gheduerende de~welke voorseide rente es beset ende versekert vp eene husinghe ende vp eene hofstede twee ende viertich roeden lants groot lichteleke meer of min ende es staende ende ligghende hoofdende an de grote strate te west~Eclo ende streckende noortwaert tote jan stasiins lande pieter van haken es ghehuust ende ghelant an de west~zide ende willem de hont es ghehuust ende ghelant an + de hoost~zide . vp welke voorseide hofstede es sculdich te ziine een waterloop an de west~zide van viere voeten breet so dat twater van der groter straten ende van der cautsiede sonder belet lopen mach vp de voorseide hofstede tote an stasiins lande Ende van jan stasiins lande tote in den waterganc de~welke voorseide waterloop joos van den doorne ende ziine nacomers houer husen moghen also verre als ziine hofstede gaet bi also dat dit voorseide water van der straten ende van der kelsieden sonder belet ende sonder wederstaen lopen mach toten waterganghe gheliic dat voorseit es de~welke voorseide waterloop joos voorseit ende ziin voorseide wiif ende hare na~comers sculdich ziin te rumene also verre als dese voorseide hofste gaet Voort so gaet huter voorseider hofsteden tiene scelinghe parisise siaers aerveleker renten simoene hughen ende hier binnen moet simoen voorseit betalen Sgrauen scult van der voorseider hofsteden Voort so gaet hute der voorseider hofsteden twaliue peninghe parisise siaers den Ore van willem ?waerde voort so gaet huter voorseider hofsteden sestiene scelinghe parisise siaers fransoyse van aersele Ende voort so hebben ghelouet joos voorseit ende ziin voorseide wiif lamsine voorseit dese voorseide rente te wette te waerne vri ende quite tieghen elken mensche met also sulken laste als hier voorseit es vooren hute gaende van der voorseider ttinghen Ende alle dese dinghen ziin ghedaen wetteleke bi consente van beeden paertien na costume ende husage van der kuere van west~Eclo jn kennessen der wareden so hebben wij scepenen voorseit desen tsaertre beseghelt met onsen zeghelen hute~anghende Dit was ghedaen jnt jaer ons heeren als men screef dusentich drie hondert neghene ende vichtich vp den sestiende dach van sporkele - - - -