Corpus Van Reenen-Mulder (CRM14): Oorkonde I217p31601

Ic gilis S_en boydins Sone / doe te wetene allen liden die dese letteren zelen zien oft horen lesen / dat ic ontfaen hebbe van s_ + broec + weghe van barsele ghemeinleec van de religiose liden / den abt en_ conue_t van sente bernarts wt brabant bi Scelle / acht pont ouder groter conincs tornose / als van die vinderscap dar si en_ ic voer terfghenote van den broeke van barsele in bleuen op peter maziere / die hi den voerghesechden liden van sente bernarts zeide te gheuene / ouer achte ghemete lants die ic hen aen~leghende was voer alle dherfghenote ghemeineleke van den broke / en_ vire pont ouder groter conincs + tornose / die de voerghezecht peter zeide dat de voerghezechde religiose lide van sente bernarts gheuen souden alsse van alle coste en_ there die men hem aen~legghen mochte van hare lande in barsele~broec waer bi ic gilis voerghesecht in orconscaep dat ic dat payment gelic alse vorseecht es ontfaen hebbe / hebbic minen zeghel aen dese letteren ghehanghen / en_ wa_t hir ouer dar dat payment ghe~daen was waren alse manne mints hers Sgrauen van vlaendere jacob S_en daenkens Sone / Bertram haghels~steen / en_ jan de pure / en_ alse Scepene van barsele~broke / jan coutweder en_ peter de boec / So biddic hem dat sie haer zeghele an dese letteren hanghen in orconscaep der wareit wi dan jacob S_en daenken Sone Bertram hagelsteen en_ jan de pure alse man en_ jan coutweder en_ peter de + boec alse scepene voerghezech / want wi ou_ dese paye waren en_ alle dese dinc ons kenlec Siin / en_ gilis voersecht ons ghebeden heft so hebbe wi onse seghele aen dese lettere ghehanghen in kenlecheit van der wareit alle dier dinghe die hir vorsecht Sijn / Dese lettere waren ghegheuen jn jaer ons + here dat men Scrift duzent drie + ondert en_ zeestiene tsvriendaechs na der tiniteit . -