Corpus Van Reenen-Mulder (CRM14): Oorkonde I218p35901

Wij Scepenen van der port van Rupelmonde maken cont en_ kenlec alle den ghenen die dese letteren selen sien en_ horen lesen dat comen es vor ons joncfrouwen katelinen socs wettelijc en_ met vogde en_ heeft verkent ende verlijt al dat si heeft ghegheuen en_ gheeft der onder~kelderwerderyen van sente bernaerts drie scellinghe grote tornoysen erfeliker renten tsiaers de~welke die + se heeft vp thuus en_ vp darue dat toe~behoert raes gillijs + soens dochter ende dese vorsegde rente es deerste rente wut~gheleghen sheeren rente welc huus en_ erue gheleghen es in de nederstrate an de ene side neffens jacops ? huus ende erue ende aen dander side neffens pieters huus van beueren en_ erue aen dander side / en_ dese vorsegde rente te gheldene en_ te betaelne van jare te jare volghende te eweliker daghe de ene helft te sente jans daghe in midden~somere ende dander helft daer na volghende te kersauonde Jn kennessen der waerheit so hebben wij scepenen vorseit dese lettere gheseghelt wuthanghende met onsen groten ghemenen seghele der port van rupelmonde . dit was ghedaen int jaer ons heren doen men screef dusentech drie hondert vijftech ende achte vp den tiende dach van inganghende maerte . .