Corpus Van Reenen-Mulder (CRM14): Oorkonde I222p33701

Dat si cont alle den ghene_ die dese lett_en selen sien ochte hoere_ lesen dat Gielijs van Ruisbroech es coeme_ voere janne van + den vere die rechtere es sanders jans jacobs En_ staes wilen jan sanders van scelle wittege kindere ware_ En_ voere hare late die hier nae bescreuen staen En_ heeft bekent dat hi heeft gegeuen en_ op~gedregen haren cnape janne vornomt jn + de hant bi sire maennessen en_ dat late wijsdoem jn gerechter gichte_ En_ jn puerre aelmoesene_ des hospitale ochte den godshuse van + der stede van calfoert / viertech scellinge payments tsiaers jaerlijks En_ erfelijks tsijs die he_ jaerlijks sculdech ware_ sophie en_ bette va_ wildenbeke en_ jan moens / te geldene desen vornoemde_ hospitale erfelike en_ jaerlijks te kersauonde / met goede_ custber? gelde gelijc dat gemeineleec jn borse geet telken geldens tide / en_ v_teech + er op met monde en_ met halme en_ v_teech alle dies rechts dat hi daer ane hadde ochte hebben mochte in eneger maniere_ t? des goedshuus behoef vornoemt en_ geloefde waerscap jaer en_ dach jege_ alle de gene die in rechte coeme_ mochte_ En_ alse dit gedaen was en_ hier toe gesciet was al datt_ sculdech toe was te gesciene mette_ rechte nae wet en_ sede van + den lande en_ soe datt_ geen poent van rechte jn en gebrac doen quam dese vornoemde rechtere bi sire maennessen en_ bi vonnesse der late dat es te wetene wille_ des cox boudens van + der biest Sanders van + de_ kleidale / En_ peter klinchamers en_ eruede segere lambrechts te des vornomds hospitaels behoef jn dese viertech scellinge erfelijks tsijs desen hospitaele vornoemt ewelike en_ erfelike te heffene te hebbene en_ te gebrukene / altoes behoudenlike ene_ iegewelken sine_ recht / Ende om~dat dit vast seker en_ gestade bliue_ soude soe heeft dese vornomde Gielijs in orconscape_ der wareit dese lett_en besegelt voere jn + de_ beginne met sine_ p_pre_ segele En_ voert meer om de meerre sekerheit soe heeft Gielijs vornoemt gebede_ wisen liede_ e bescedene_ Saese vornomt alse here . janne van + de_ vere alse rechtere en_ laet willeme den coc alse laet dat si met hem in orconscape der wareit hare segele ane dese lett_en hange_ wille / En_ wi Saes jan en_ wille_ vornomt om~dat dit vast seker en_ gestade bliuen soude soe hebbe wi ouermids bede en_ v_suec gielijs vornomt jn vaster gestadecheit jn orconscape_ der wareit jn alle_ vorsprokene_ manire_ dese lett_en besegelt met onsen segelen wthangende / jnt jaer ons here_ alse me_ screef dusentech drie + hondert En_ seuene en_ dertech jn sente jans auonde baptiste dat men segt midden~somere -