Corpus Van Reenen-Mulder (CRM14): Oorkonde I241p31001

An alle de ghone die dese lettren sullen sien ofte hoeren lesen / Scepenen van der stede van ghent saluut met kennessen der waerheden / weten alle dat der heinric de jonghe en_ der woutre leewerke onse ghesellen jnt Scependom / ons kenlic ghemaect hebben / dat Sij alse prouisoerres van onsen haluen van den gasthuse van ghent hebben ghegheuen en_ gheuen janne broetloese en_ mergrieten sinen wiue / een stic lands dat een merschelkin es / ligghende bachten tfoerseids jans broetloes omme twintech scele parisise tsiaers / te eenen herueliken tsense / te houdene en_ te besittene te hare beeder liue / ofte tsgheens liue die langhest leuen sal van hem beeden / omme den voerseiden tsens / en_ niet langher / Jn kenlicheden van desen lettren beseghelt met onsen cont_saiele van der stede van ghent voerseit / Die waren ghemaect en_ ghegheuen jnt jaer ons heeren doe men screef . M CCC . + en_ tiene jn sente pieters daghe jn sporkele .