Corpus Van Reenen-Mulder (CRM14): Oorkonde I241p35101

Kenlijc zij allen den ghenen die nv zijn / Ende hier naer wesen zullen . Dat jacob van berghe priester heeft ghecocht / ende ghecreghen wel / ende Redenlike jeghen ver Mergrieten ziere moeder lieuijns stocmans weduwe De Eeruelike Rente Ende de bileninghe tsiaers / ghelijc dat hier naer volghet bescreuen . . Dat es te wetene . Deene heelft van . achte ende dertich . sceelghe . tiene . peenghe / ende . eenen . allijnc paris_ . Eerueliker Renten elkes jaers Ende jn dandre heelft / . deene heelft / . Ende . deene heelt van . zesse . sceelghen . vijf . peenghen ende eenen allijnc par_ tsiaers de bileninghen also langhe alse ver Mergriete voorseit leuen zal . al ligghende jn den quaetham vp de Erue daer Ser zeghers / Ser philips huus vp staet . . Ende van desen voorseiden parcheelen Eerueliker Renten / Ende bileninghen tsiaers ghelijc dat vooren ghesceeden staet / Es de voorseide ver Mergriete hutegheghaen / ende zoe heuets gheworpen met alme / . Ende zoe heeft den her jacoppe haren zoene voorseit der toe ghedaen / ende ghedreghe_ vppe / Ende zoe heeft oec daer toe ghedaen met hande ende met monde al dat zoe sculdech was te doene na de wet / costume / ende vsage van der poort van ghend / Omme hare der af tontEeruene / ende tontgoedene . Ende den heere jacoppe voorseit jn deene heelft van . xxxviij . s_ . x . d_ (onleesbaar) . Eerueliker Renten tsiaers voorseit te Eeruene en_ te goedene alse jn zijn propre Eeruelike ghecochte ende ghecreghene goed / . Ende jn dandre heelft . . de heelft . . Ende de heelft van . vj . s_ . v . d_ (onleesbaar) tsiaers de bileninghen van ver Megrieten voorseid vp de voorseide Eerue / also langhe als zoe leuen zal . Ende zoe gheloefde hem wettelike waersceep te doene na de wet Costume ende vsage van der stede van ghend En_ her jacob voors_ beual hare de waersceep weder alse Recht . . Ende ver megriete voornoempt bekende hare al wel vergholden / betaelt / ende al ghemoet van den her jacoppe voors_ / alse van den voorseiden coepe . . Hier ouer waren gheroupen jn kenlijcheden alse heerfachteghe liede binnen ghend . jan Contenay / ende jan vten berghe her lieuijns broeder vten berghe priester . . Dit was ghedaen jnt jaer ons heeren doe men screef . dusentich . drie + hondert . + vijftich . + ende . + Een . vp Sente luuxs dach Ewang_l___e