Corpus Van Reenen-Mulder (CRM14): Oorkonde I241p35301

Kenlic si allen den ghenen die nu siin ende hier naer wesen zullen dat Broeder jan Coutaert Meester van den begghaerden in de stede van ghent in den tijt dat dese dinghen hier naer ghescreue_ ghedaen waren heeft ghecocht wel en_ redenlike jeghen den heere jacoppe vten berghe priester_ neghentien schelle vijf penne parisise ende eene poiteuine jaerleker en_ eeweleker renten te gheldene telken sente bamesse . ende dat om eene somme van ghelde van der welkere der jacop hem kent wel en_ redenleke te vullen betaelt en_ al vp vernought van broeder janne voerseit . welke voerseide heruelike rente broeder jan heeft ghecocht ter fermerien bouf van den begghaerden voerseit ende soe es gheleghen vp de herue van voren ter straten tote bachten in de schelde daer zegher ser filips een huus vp heeft staende met tween gheuelen naest den huse ende den herue toe~behoerende den heere janne van huesdinc in deene side . ende naest den huse ende den herue toe~behoere_de fransoise sloeuen in dandere side al ghestaen ende gheleghen in den quaetham van welker_ voerseidere heruelikere renten der jacop hem heuet onthereft ter fermerien bouf voerseit ende ontgoedt met monde met alme en_ met ochwerpinghen ende met al der toe te doene dat hire toe schuldech was te doene naer wet costume en_ vsage van der stede van ghent . ende heeft + er Broeder janne inne ghehereft en_ ghegoedt . en_ der jacop beloofde hem waerscap naer wet costume ende vsage van der voerseider stede van ghent . ende Broeder jan beual + se + hem weder alse recht Hier ouer waren gheroupen in orconschepen alse heruachteghe liede binnen ghent jacop de wale en_ jan ?aquaert . Dit was ghedaen int jaer ons heeren als + men screef . M . + CCC . + ende drie ende vijftech vp onser vrouwen dach in Maerte