Corpus Van Reenen-Mulder (CRM14): Oorkonde I241p35601

Kenlec sij allen den ghenen die nu sijn en_ hier na wesen zullen / Dat zegher huten dale heeft ghecocht en_ ghecreghen wel en_ redenlike in de name van Claykine en_ Meerkine Clais kindre huten houe waren / jeghen mijn heere Symoene den riken Ruddre Ghiselbrechte den grutre ghiselbrechts zone was Ghiselbrechte van den damme en_ wille_me den pape piet_s zone deeruachtechede ligghende vp de hoeghe poert tusschen scepene huus an deen zide en_ caelmont an dander zijde / vp de~welke eeruachtechede symoen go_maer een huus heeft staende dat men heet den pelegrijm met zeuen ponden en_ tiene sceleghe par_ jaerlix der hute gaende te lant~cheynse / En_ dit o_me eene zekere so_me van ghelde van der welker de voers_ vercoepers hem kenden wel betaelt / ghemoet en_ ghenouch ghedaen / en_ ghinghen hute van der voers_ eeruachtecheden en_ worper / en_ dader toe met hande en_ met monde al dat sij sculdech waren te doene na wet / costume / en_ vsage_ van der stede van ghent / o_me hem lieden der af tontheeruene en_ tontgoedene / en_ zegher voers_ was der in gheerft en_ ghegoet in de name van den voers_ kindren alse in sijn vrie eyghijn coep~goet / En_ de voers_ vercoepers gheloefden zegheren voers_ in de name van den voers_ kindren wettelike waerscap en_ hi beual + se hem lieden weder alse recht / En_ voert es te wetene dat de voers_ vercoepers hebben hier af veruaen en_ elc ouer al / al thoyr van mijn heere woutren van berchem was ruddre die hem eenechs rechts vermeten mochten an dese voers_ eeruachtechede / Hier ouer waren gheroepen in orconscepen alse eeruachteghe liede in ghent / Der jan rijnvisch priester / Symoen de grutre heinricx zone was / en_ lieuijn Rijnvisch / Dit was ghedaen jnt jaer ons heeren doe men screef . M . + CCC . + zesse en_ vijftech den zesse en twintechsten dach van Nouember - - - -