Corpus Van Reenen-Mulder (CRM14): Oorkonde I241p36201

An alle de ghene die dese jeghenwordighe l_ren sullen sien Of horen lesen . Wij broeder jan lauwerins . Meester / van den beghaerden jn de stede van ghend / Ende alle de broeders en_ elc sonderlinghe van der seluer stede Saluut met kennessen der waerheden wij hu allen doen te wetene En_ elken sonderlinghe Dat wij hebben vercocht . Onser lieuer gheminde . jn gode ver Aeghten . ser Mattheus van ghendbrugghe wettelike wijf Twalef pond . par_ . Of de weerde jn Andren ghelde / alsulc ghelt alse de stede van ghent . jaerlix sal doer ontfaen van haerre erueliker renten Ende dit tharen liue lanc ghedure_de En_ niet langh_e O_me ene somme van ghelde van den~welken dat wij broeder jan voors_ En_ alle onse broedre van den voorseiden beghaerden en_ elc sonderlinghe Ons seluen kennen wel en_ soffisantelike gheel en_ al betaelt en_ vergolden jn goeden ghereeden en_ wel ghetelden ghelde . De~welke twalef . pond . par_ . wij broeder jan vors_ Ende al onse vorseide broedre Ende elc sonderlinghe hebben bewijst . En_ versekert . bewijsen en_ versekere_ vp Ons en_ vp al onse goed / so waer dat gheleghen es binne_ ghend Of der buten . Ende belouen dat der vorseider ver Aeghten bi trauwe_ en_ bi waerheden te gheldene En_ wel te betaelne Deerste payme_t . jn onser vrouwen daghe lichtmesse . jnt jaer M˚ CCC˚ . + drie en_ tsestich En_ also voort . van jare te jare haer leuen lanc ghedurende En_ niet langh_e also vors_ es zonder haren cost . en_ scade . En_ gheuielt so dat soe scade der bi hadde Die scade gheloue_ wij hare Ouer ons en_ onse naco_mers vp te rechtene en_ te gheldene metter principaelre renten sonder yet te minderne jn orcondscepen En_ jn kenlijcheden der waerheden So hebben wij broeder jan En_ alle onse vorseide broedre dese l_ren doen zeghelen metten zeghele van onsen ghemeene_ co_uente huuthanghende Die waren ghemaect en_ ghegheuen jnt jaer ons here_ als me_ screef M˚ CCC˚ . + twee en_ tsestich vp den vijftiensten dach in laumae_t