Corpus Van Reenen-Mulder (CRM14): Oorkonde I241p36902

Wij heinric louf . gillis van lathem . Clays van ertsbuer / jan van wetti? En_ (onleesbaar) stul prouiserres mits~gaders onsen ghesellen van sente jacops huus . vp tnieweland . bij ghend jn dien tijden dat dese dinghen waren ghedaen . Doen te + wetene allen liede_ die nu zijn En_ hier naer wesen sullen / . Dat wij hebben vercocht wel en_ redenlike / marien vernienen . viertien grot_ tornoyse jaerlics te haren liue . De~welke rente soe sal ontfaen . Elxs ziaers vp onser vrouwen dach te lichtmesse . En_ ten ende van haren liue van den vorseiden viertien gro_ torn_ . so sullen heffen en_ ontfa? . De aerme van den vorseiden huus . twaelf groter torn_ . En_ een priester die ouer haer messe sal doen . vp dien tijt twee grot_ torn_ . En_ al dit o_me eene sekere so_me van viere . + en_ twintich schellinghe groter tornoyse . waer af wij prouiserres voren ghenoemt in den name van den vorseiden godshuuze . ons kennen vernought en_ wel betaelt . jn kennessen der waerheden . hebben wij prouiserres voren ghenoemt ouer ons en_ ouer onse naer~co_mers . dese presente lettren bezeghelt huuthanghende met den ghemeenen zeghele van den vorseiden godshuuse / . Dit was ghedaen jnt jaer ons heeren . als men screef . dusentich . + drie + hondert tsestich en_ neghen vp den sesten dach van sporcle .