Corpus Van Reenen-Mulder (CRM14): Oorkonde I241p37201

Kenlic zij allen lieden Dat jan de smet Gillis zone van hoerenbeke heeft ghecocht wel en_ redelic gheghen janne van nieneue den s?aefmakere . een . huus staende vp den houc van der habeelstraten met al den ghelaghe al soet gheleghen es en_ ghestaen vp der bogaerden herue met . twalef . sceelen . en_ . drie . peenen . par_ . huutgaende . tsiaers . ten lantseinse die vallen te ghelden telken . half . Maerte en_ dat om . een . zumme van ghelde om . hachtien . pont . lichter . munten . tsiaers . lijfrenten te jans huus van nieneue vors_ en_ te lijsbetten sijns wijfs en_ niet langhere lancst leeft gheel heft En_ ten hende van haerre beeder liue sal jan de smet vors_ dit huus vors_ hebben en_ behouden oft sijn oer ghelijc sinen andren propren goede metten lantseinse die + re hute gaet En_ dese lijfrente vors_ valt te gheldene en_ te betaelne ten . tween . terminen van den . jare . deen . heelft te sente jans messe naest comt En_ dander . heelft te kersauonde naest volghende en_ alsoe voert van jare . te . jare . En_ jan de smet vors_ heeft dit huus vors_ ghelooft te houden staende van dake en_ van weeghen en_ van al datter an quame te makene in redelicheden En_ waert soe dat jan van nieneue vors_ niet betaelt en ware van siere renten vors_ ten vors_ termine en_ . deen . termijn . dander hachteraelde so mochte jan van nieneue vors_ slaen sijn hant an sinen pant dats te verstane an dit huus vors_ ghelijc sinen propren goede toter tijt dat jan van nieneue vors_ vernought ware van siere renten vors_ En_ dit heeft jan de smet vors_ bekent vp hem en_ vp al tsine hoe en_ so waer dat gheleghen ware oft ghestaen Hier ouer was gheroupen jn kenlicheden hals lantheere in den naem van den couente van den bogaerden broeder Symoen van den habeele En_ hals heruachtiche liede in ghend broeder jan coutaert En_ jan van den pitte Dit was ghedaen . jnt . jaer . ons heeren doe men screef . dusentich . + drie + hondert . + twee + en + tseuentich . te half . Maerte .