Corpus Van Reenen-Mulder (CRM14): Oorkonde I241p37701

Kenlic sij allen lieden dat gillis de hodeueere ende aechte va_ reetbosch sij_ wetteleke wijf hebbe_ vercocht wel ende redeleke Janne van den gauere ende alijssen svos zine_ wetteleke_ wiue een huus ende stede met alle den ghelaghe die den huse ende steden toe~behoren van vore_ tote achter ter scelden toe comende erd~vast ende naghel~vast staende vp tsant bi sente lievins poorte an de west~zide van der strate_ pieter de vos woo_nende jn deen zide Ende Jan pieters Jn dander zide vp die erue toe~behorende sente Jacobs huse ende eenre capelryen van sente verhilden met viuetiene schelle paris_ siaers daer huut gaende sente Jacops huse vors_ ende viue scelle achte penne allinc paris_ der capelryen vorn_ te lantcheinse sonder mer co_mers Ende dese coop es ghedaen om lijfrente te gillis liue ende te aechten sijns wijfs bouf vors_ . dats te wetene dat die vors_ Jan van den gauere en_ allijsse sij_ wettelike wijf vors_ of de ghene dien dit vors_ huus ende stede namaels toe~come_ sal waert bi sterften of bi cope zullen gheue_ alle Jare gillise en_ sinen wiue vorseit viere ende twintich schelle groter tornoyse alse langhe alsi beede leue_ zullen te tween termine binne_ elken Jare deene heelt te sente Jans daghe Jn midden~somere Ende dander heelt telken kersauonde daer of deerste payement valt sente jans daghe babtisten Jn midden~som_e naest comende Ende so wanneer deen van hem beede_ sterft so sterft alf de lijfre_te vors_ Ende so wa_neer dat sij beede sijn comen van liue ter doot so es tvorseide huus vri ende ontslegen van al + der vorseider lijfrente_ Ende Jan van den gauere ende alijsse sijn wijf sullen dat vorseide huus ende stede wel ende soffisanteleke houden te ghereke van dake ende van weeghe_ en_ van al dies hem behouue_ sal altoos meer beterende dan erghende ende dit met hare_ costen ende ghelden alle Jare den lantcheins vort es ghelofte ende vorwaerde Jnde dese come_scepe dat gillis de hodeueere ende aechte sij_ wetteleke wijf zullen behouden in dit huus ende stede haar~lieder leuen lanc zonder haren cost twee solres slot~vast thare_ aysemente al sulke neeringhe in te doene als he_ ghelieuen sal ende een bedde staende beneden vp den vloer hare_ wille mede te doene ende hebbe_ haerre~lieder gaen ende keere_ dor thuus ten lochtine huut ende behouden alf de_ lochtin them waert thare_ aysemente ende p_fite . vort sullen sij behoude_ de kokene ende eene scaperade ende den stal sal wesen ghemeene Ende dit sal wesen also langhe als gillis ende aechte sijn wijf of de lancste leuende van hem beeden leue_ zullen ende niet langh_e . Ende mids desen gheloften coop ende vorwaerden so waren Jan van den gauere Ende alijsse sijn wijf ten vors_ huse ende steden ghedaen metten lantheeren als te haren propere_ coop~goede met al daer toe te doene dat men sculdich was te doene naer costume ende husage der stede van ghend die~welke lijfrente ghelofte ende vorwaerden Jan ende alijsse sij_ wijf vorseit hebbe_ bewijst ende verzeekert vp tvors_ huus ende stede ende vp al dat sie + re binnen hebben of hebben sullen Ende vort vp hem beden Ende vp al haer goet Ende ware hier of eenich ghebrec dat hebben vort gheloft te vuldoene als goede borghe_ ende elc ouer al gillis van den vpbrouke ende Jan symoens Elc vp hem ende vp al tsine hier ouer stonden Jn orcontscepen als lantheere_ h_ willem van ? priester ende zegher van den velde als lantheere ende ontfangh_e Jn den name van sente Jacops huse vors_ Ende alse heruachteghe lieden Jn ghend pieter + tsmet ende matheus de vijlre . dit was ghedaen Jnt Jaer ons heere_ alse men screef . M˚ . + ccc . + seuene en_ tseuentich . vp den . xiiijsten . dach in wedemaent