Corpus Van Reenen-Mulder (CRM14): Oorkonde I505p36901

Wi Wout_ Wouters zoen en_ vranke jan vranke_ zoens zoen goedshuus~meesters te scipliede doen cont alle_ luden dat wi hebben vercoft van ons goedshuus weghe_ voers_ bi rade en_ goetdenken der ghemienre bure / Willaem van der burch symons zoen / vier scellinghe jaerlicse renten / die dat goetshuus voers_ staende hadde / op zeuen morghen lands luttel meer of min dat hughe rolleboens lant plach te hieten gheleghen in + den ban van maeslant van welken vier scellinghe jaers goeds ghels alsoe alse dat goedshuus voers_ daer op staende hadde / wi ons belien betaelt / den lesten penninc met den eersten ende ghelouen him dese renten te waren van ons goedshuus weghen voers_ In kennesse der waerheyt / soe hebbe ic Wouter voerghenoemt / desen brief bezeghelt met minen zeghel / ende want ic vrancke voers_ selue ghienen zeghel en hebbe soe hebbe ic ghebeden boudijn van naeldwijc / dat hi desen brief voer mi bezeghelt heeft met zinen zeghel / ghegheuen jn den jaer ons he_n dusent drie hondert neghen + ende + tsestich op zinte bertholomees auont - -