Corpus Van Reenen-Mulder (CRM14): Oorkonde I549r38401

Wj jan kotten sone symoen heinrix sone ende zwane pieter buysen sone scepen_ in zirixe Orkonden en_ kennen dat hughe jacops sone van rotterdamme vercochte ende vpdroech in rechten eyghendoeme jan troode clays sone Een hofstede ligghende in die nieweport ende willem kint nv bezeten heuet als alle die hofstede ghelt neghentien grote tsiaers tot eenen brande ende den arfpacht te betalen alle jare telken korsauonde met alsulken paymente als + men alle jare ghemeenliken arfpachts betaelt jn zirixe Ende na den brant dese vors_ hofstede vp jan troode clays sone te arghen ende te bet_en welke vors_ hofstede gheleghen es binnen desen lantghemarken den vliet oest of jan zoeteman met eenre schuyre zuyt of die strate west of ende jan jans sone wte duuelant nort of Ende hughe jacops sone van rotterdamme beloefter jan troode clays sone waerscepe hier of te doene vp siin goet ghewonnen ende onghewonnen soe waert gheleghen es te vollen rechte ende allen co_mer of te doene diere vp ghewesen heuet voer den daet van desen brieue Ende allen aenbert of te doene / jn Orkonden desen brieue bezeghelt met onsen zeghelen ghegheuen . vpten drie en_ twintichsten dach in nouember jnt jaer ons he_en M˚ ccc˚ vier en_ tachtich