Corpus Van Reenen-Mulder (CRM14): Oorkonde I549r39901

WJ broeder adriaen gardiaen Ende alle andere broederen ghemeenliken van + der minderbroederen conuente jn zyrixe Doen cond allen luden die desen brief zullen zien jof horen lesen dat wi ghelooft hebben en_ sculdich ziin te doen Ende bi + der ghenaden gods doen zullen in onsen conuente vors_ eeweliken duerende ende alsoe langhe als onse conuent vors_ staen zal vor heere clais keruinghe van reymerzwale Ridder en_ vor vrouwe liisbetten van aernemuden . en_ van Reymerzwalen ziins wijfs zielen . Ende vor alle hare beyder ouders zielen daer zijs voren begheren Eene misse alle daghe Ende daer toe elke weke eens auonds eene vighelie Ende des daghes daer na eene misse van requiem singhen Ouermids alzulker aelmoessen als heer clais ende vrouwe liisbette vornoemd onsen conuente vorscreuen ghegheuen ende bewijst hebben En_ die hebben wi ghelooft te houdene ende te voldoene als vors_ es vor ons en_ vor onse nacomelinghen in onsen conuente vors_ jn kenness_ der waerheit soe heb ic broeder adriaen en_ dat ghemeen conuent vorscr_ desen brief beseghelt met ons conuents zeghele ghegheuen vp Sinte jans dach decollatio jnt jaer ons heeren M˚ + . ccc˚ neghen ende neghentich