Corpus Van Reenen-Mulder (CRM14): Oorkonde I565r31501

Allen den Ghenen die dese lettre zullen zien of horen lezen . Jc Pieter pieters zone ende Adelise mijn wijf Maken Cont ende kenlic Dat Wi gheset hebben ende ghemaect bi onsen vrien wille ende bi goeder lieden rade in oflaet van alle onse zonden puurlike omme gode ende in rechter alemoesene / Ene Capelrie in westmonstre ewelike ghedurende ende staende vor ons vader zielen / vor onser moeder zielen Vor ons selues zielen ende vor onser vriende zielen / neghen ghemete lants lichtelich min ofte mee lighende beoesten sente laurens in brigghedamme ambocht . Ende viue ghemete lants lichtelich min ofte mee ligghende benorden zande an porten Moer . + weghelijn Ende daer bi soe willen wi soe wie die deze Capelrie heuet dat hi hem ornament / wijnt / hostiet ende kelct . Ende van dezen vorseiden goede zal gaen elcs iaers ewelike ghedure_de ende staende een pont paeyments jn deser manieren dat die ghene die die Capelrie heuet dat hi doen zal elkes iaers onse iaerghetide / ons vader / onser moeder en_ onser vrienden . Ende hi zal coopen elcs iaers twe pont was een pont te vigelien kaersen ende tander pont toffer~.-lecte Vort soe wat priester die in westmonster gheprouent es en_ auentijts es te vigelien ende nuchtentijts ene zielemesse doet in dese vorseide kercke dien willen wi dat heuet twelf pene / En_ daer bi soe willen wi dat zi ghedinken openbare in hare messen onser zielen / ons vader onser moeder en_ onser vrienden . en_ camen zi te vigelien niet no negheene messen en daden soe willen wi dat men hem niet en + gheuet . Ende dit beuel? wi dien ghenen die die Capelrie heuet te verwaerne in zine ziele . Vort soe zal hebben die dese Capelrie heuet twe scele . die scolemeest_ twe scele van zinen kinder . en_ die coster twelf pene . En_ dat daer bouen bliuet ? zal + men deelen omme gode . Ende dese Capelrie zal + men besinghen soe waeneer dat die erste steruet van ons beeden pieter of adelise vornoemt sonder eynigher~hande aerghlist . Vort soe behouden wi Pieter / en_ adelise vornoemt dese ghichte te gheuene van deser vorseider Capelrie also langhe alse onser eynich leuet van ons beeden . ende die wise danne gheuen die zalse behouden te zinen liue . Ende na onser twier doot . ende na der gherre doot die wise ghegheuen hebben soe setten wi die ghichte en_ gheuen ewelike van deser vorseider Capelrien te ghe?ene der abdissen van onser vrouwen Camere in dumburgh bi den rade tsgardiaens van Middelburgh enen goeden man daert hem lieden dinct dat soe wel bestet es (-) gode . Vort soe gheuen wi Pieter ende adelise vornoemt tenden der achterster doot van ons beeden den helighen ghest in westmonstre elkes iaers een zeue tarwen ewelike staende en_ ghedurende telken Medewintre te gheldene . Ende in diere manieren soe gheuen wi den gastlieden in Middelburgh elcs iaers drie traueltonnen byers (-) + gane Middelburghs byers dat es te wetene die ene tonne te paeschen / die andre te sinxen / ende die dorde tonne te Medewintre . Ende dese tarwe en_ dit byer setten wi vppe thuus en_ vppe die hofstede daer wi zelue nv vp woenen in die nortstrate ligghende ende staende ieghens die halle ouer an die oestzide van + der straten Ende dit goet nemmermee te vercoopene no te verlegghene dese vorseide alemoesene ne bliuen lighende vppe dit vornoemde huus en_ hofstede . Ende o_me~dat wi willen dat dese vorseide Capelrie en_ alemoesene / ewelike vast ende ghestade bliue sonder eynigherhande weder~segghen van onsen na~comelinghen soe hebben wi ghebeden en_ bidden gheesteliken lieden Eerzamighen waerliken en_ wisen den abt van Middelburgh / den deken van sente pieters / den gaerdiaen van den Minderbroeders / der abdissen van onser vrouwen Camere in dumburgh / En_ die ghemene port van Middelburg dat zi deze lettre bezeghelen willen met haren zeghelen . Ende omme die meerre zekerhede ende die beden pieters / ende adelisen zijns wijfs vorseit / soe hebben wi abt / deken / Gaerdiaen / abdisse / Ende die ghemeene port vornoemt deze lettre bezeghelt met onsen zeghelen vuthanghende . Dese lettre was ghemaect / en_ ghegheuen in ons heren iaer / als + men screef duzentich drie hondert en_ vichtiene des vriendaghes na sente Odulfs daghe - - -