Corpus Van Reenen-Mulder (CRM14): Oorkonde I565r32101

WJ . . Scepenen . burghmeysters ende die ghemene port van Middelburgh orconden ende maken kont allen dien ghonen die desen brief zien jof horen zullen lesen dat . Adelise pieter pieters zons heeft ygheuen har janne hughe zaelden zons sone . een . ghemet lants tote zire capelrien die pieter pieters sone en_ adelyse voernoemt hem ghegheuen hebben tote zinen lyue . + toe wilc ghemet lants leghet met . neghen . ghemete lants van + der voerseyder capelrien ghemene beoesten sinte lauwereyns in tambocht van bricdamme . en_ hier bi zoe zal har jan voerseyt doen mijn jaerghetyde en_ pieters mijns mans met half diere renten van desen ghemete lants en_ die ander halft bliuet hem in beteringhen tote zire capelrien ende noch zoe zal har jan voerseyt wytgheuen tote diere renten van half desen ghemete lants tote onsen voerseyden jaerghetyden mede te doene . tien . penninghe ouder groter koninx tur_ elkes jaers die wi ghesettet hebben vppe die . viertien . ghemete lants die tote onser capelrien boren voerseyt Jn orcoden en_ in kennissen dat dese voerscreue sticken ewelic vast en_ ghestade bliuen zullen hebben wi desen brief ten saken voers_ ghezeghelt met onsen ghemenen port~zeghele Jn den jare ons heren . duzent . drie . hondert en_ een ende twintich . des sondaghes voer sinte Symons ende judas dagh der apostelen