Corpus Van Reenen-Mulder (CRM14): Oorkonde I565r34501

Jn die name des vader tsoens en_ tshelich gheests amen Jc clais clais zone machtich mire sinne en_ wel bedocht hebbe ghemaect miin testament in v_laet van minen zonden jn deser manieren Jn den eersten so gheue jc ende bewise mire p_chye~kerken een ghemet lants te nemene in west_~yenlant dat daer over~bliuet van miins vader en_ mire moeder jarichtide lande en_ voort sine volle tote enen ghemete toe jn oester~yenlant also vp te comene alst leghet na mine doot En_ daer of sullen die kercke~meesters elcs doen miin jarichtide en_ wouter tser henrics zoens miin ouder~vader met tien groten eewelike staende en_ aldus te deelne den papen twee grote den costere enen groten te wasse twee grote en_ vijf grote den armen / voort gheue jc den heligheest wat daer over~bliuet in oester~yen~lant boue den jarichtide lande in rechten eyghindome / voort gheue jc elken pape twaelf grote jannekine minen neve ses grote hughe den cost_e twaelf grote laurense den cost_e enen groten / der aermer liede lechte gheue jc ses grote yegheliken helighen die in die kerke ghebeelt staet drie grote voort sette jc eenen vollen jaerzanc / voort sette jc toter capelrien die begonnen was van henrike minen broeder vp vijf ghemete lants dat men heet jan hughen zoens lant en_ daer + (-) vijf ghemeten / + toe daer toe sette jc drie verendeel lants lichtelic min jof meer ligghende ant capelrielant en_ vierd + alf ghemet lichtelic min jof meer lighende an die zuutzide an bomerslant en_ drie verendeel lichtelic min jof meer ligghende noortwaert ou_ den wech daer jc woene / Ende dese voerseide capelrie gheue jannekine jans willes zoens zone minen neue te sinen liue puurlike omme gode vp~dat hi he_ al~so besette dat die capelrie bi he_ verwaert en_ v_dient worde Ende na sine doot die ghifte van der capelrien altoes te stane jn des abts handen van middelburgh wie hi si ende die te verdiene jn die kerke van griipskerke / waer oec die zake dat jannekiin miin neue he_ al~so beke?de dat die capelrie bi he_ niet wel v_dient en_ v_waert ne ware so begheere jc dat miin heere die abt die capelrie gheue eenen goeden man die se v_diene en_ wel v_ware gheliic jof jannekiin doot ware / voort gheue jc die hofstede daer jc vp woene wat daer arue es tote eenen gasthuze jn die eere van onser vrouwen ende alle die husinghen die vp die hofstede staen en_ twee die beste bedden die jc late wel berecht va_ al dat daer toe behoort met den (-) bedden en_ eene swarte withoefde coe / Ende daer toe viere ghemete lants die ligghen jn wille_ jans zoens kinder ambocht en_ die pitmeet vore heine vos daer pieter neesen zone vp woenet ende al~so verre als pieter dat la_t bew?nt en_ besleghen heuet dat wille jc dat hi hebbe jn huren van den gasthuse tghemet omme sesse ende twintich grote elcs jaers en_ die betale tallen middewinteren al~so langhe als hi daer op woenen wille jof sine nacomelinghe / voort so wille jc dat mine testamentoers daer toe zien dat die huzinghen niet te~stoeren en_ dit goet beleet worde tote tsgasthuus oerbare en_ daer jn broed_s en_ susteren ontfanghen also als tgasthuus ghewesen mach / heine vosse hebbic v_huurt die hofstede daer hi vp woent also langhe als hi jof siin wiif daer vp woenen willen omme sesse en_ twintich grote tghemet tallen ?winteren te betaelne / voort so hebbe jc v_huurt van minen leene goeden cnape_ die daer an cost ghedaen hebben dien cost wille jc dat mine arfnamen he_~lieden beteren bi den gheburen eist dat jc sterue den armen jn griipskerke so gheue jc tien achtendeel taerwen te deelne bi den heligheest~meesters / katerine pieter heinekins zoens dochter een verendeel taerwen / alaerde hughen zone een verendeel taerwen voort gheue jc elker prochye~kerken in walgheren drie scellinghe jn drien te deelne der kerken den helighen gheest ende den pape / elken gasthuze in walgheren twaelf penninghe / den minderbroeders gheue jc ses grote / den augustinen ses grote / den jacobinen drie grote / den conuente jn waterloeswerve tien grote / den co_uente jn zoetendale tien grote ver gheylen van zandiic ses grote / arfnamen clais sapen zoens bewise jc twaelf g_te wille_me hughe jans zoens zone twee scellinghe grote / sente jans huze te brugghe tien grote / voort sette jc een pond grote ene bedeuaert te sente jacobs en_ tote onser vrouwen te roetsemadoen mede te doene vp maes jans zone binne den eersten jare na mine doot en_ gheue he_ mine dobbel heuke en_ minen dobbelen caproen en_ viif elnen linins lakens / alle mine ander cleeder wille jc dat mine testamentoers gheuen also als hughe die cost_e bescreuen heuet / aechten minen joncwiue gheue jc ene swarte coe van drie jaren vore haren aerbeit en_ si heuet een scaep gaende met minen scapen pieter lisen zone heuet daer een scaep marie boudin diederics zoens een scaep louwerkine doedins zone gheue jc een scaep miins vader en_ mire moeder jarichtide die sette jc vp griele boudins miins broeder dochter na hare doot te comene vp hare outste cnechtkiin en_ also voert gaende altoes en_ dit staet vp oester~yen~lant van der west~siden jnwaert / henric miins broeder jarichtide sette jc vp doedine wouters zone / Ende na sine doot te comene vp die kerke en_ den helighen gheest van griipskerke eewelike staende (-) (-) van minen testamente kiese jc minen here den abt van middelburgh den prouisoer van walgheren van des biscops weghen heren henrike poppen zone rente?ester bewester~scelt heren hughen van scarpenisse minen prochypape h_en willem van vlaenderen sinen gheselle / janne willems zone ende symoene willems zone mine neuen Ende sette jn haren handen al miin goed daer of niet te porne noch te deelne eer dit testament al vergouden es ende miin vterste wille volcomen es ware oec die zake dat eenich van minen arfnamen dit testame_t beletten wilde ende minen vtersten wille achtersetten so gheue jc den prouisoer van walgheren viertich pond swarte minen vtersten wille te starkene en_ te helpene dat hi volcome Omme~dat jc wille dat alle dese voerscreuene dinghen vast bliuen en_ ghestade so hebbe jc desen brief open doen bezeghelen met minen zeghele / Ende omme die meerre zekerhede so hebbe jc doen bidden en_ bidde minen exsecutoers voernoemt dat si den brief bezeghelen met mj Ende wi exsecutoers voerscreuen hebben dit testament met claise voerseit bezeghelt omme sire beden wille met onsen zeghelen vthanghende Dit was gedaen jnt jaer ons heeren duzent drie hondert viue ende viertich vp onser vrouwen dagh jn maerte