Corpus Van Reenen-Mulder (CRM14): Oorkonde I565r34801

Allen den ghenen die desen brief zien zullen iof horen lesen . Jc haddeman haddemans zone van westerzubburgh make cont ende kenlic . Dat ic Jn + der eeren gods / marien ziere lieuer moeder . alle gods heylighen . ende in + der eere van + den heylighen cruce . ghedotert hebbe ghefundert ende gheordineert een capelrie eweliken te verdienen te westerzubburgh voer theylighe cruce . voer miins vad_s ziele miere moeders ziele voer miin ziele . voer willems mijns broed_s ziele . also als mi willem min broeder bat ende sijn vt_sten wille was in zinen laetsten leuene . ende voer alle miere vrienden ziele . Ende daer toe gheuic ende zette tien ghemete lands littel min iof meer ligghende in achte stics alsoe als hier na volghet Jn + den eersten ander + half ghemet lands littel min iof meer ligghende in oost_zubburgh dat piet_ belien zone an huren heuet binnen desen vieren ghemarken . baselis ians sone leghet an + die oostzide . die herewech an die zuutzide . auesoete ian hannekijns zons an + die westzide . ende die costerielant van oost_zubburgh an + die nordzide . Jtem twee hondert roeden lands littel min iof meer ligghende in oost_zubburgh dat piet_ belien zone an huren heuet binnen desen vieren ghemarken . Hughe melsart leghet an + die oostzide . baselis ians sone an + die zuutzide . symon hannen zons kind_e an + die westzide . ende die herewech leghet an + die nortzide . Jtem twee hondert roeden lants littel min iof meer ligghende in oost_zubburgh . Dat piet_ belien zone an huren heuet binnen desen vieren ghemarken . Die herewech leghet an + die oostzide . baselis ians zone an + die zuutzide . Ende hanne heynric buffels stiefzone ende sijn kind_en ligghen an + die westzide ende an + die nortzide . Jtem hondert roeden lants littel min iof meer ligghende in oost_zubburgh . Dat piet_ belien zone an huren heuet . binnen desen vieren ghemarken . hannekijn hanne wout_s zons zone leghet an + die oostzide . hannin moenin hughemans zone an + die zuutzide . een half ghemet crwslands an + die westzide . ende die herewech legh_ an + die nortzide . Jtem dord + alf ghemet lands littel min iof meer . ligghende in west_zubburgh voer hughe willems zons binnen desen vieren ghemarken . lize crvnen leghet an + die oostzide een zoecwech an + die zuutzide . hughe willems zone leghet an + die westzide ende an + die nortzide . Jtem twee ghemete lants littel min iof meer . ligghende in Coudekerke zuutwart ou_ piet_ wouters zons . binnen desen vieren ghemarken . die herewech leghet an + die oostzide . piet_ wout_s zone leghet an + die zuutzide an + die westzide ende an + die nortzide . Jtem viere hondert roeden lants littel min iof meer ligghende in Coudekerke ende es ghehaten die holle~moer binnen desen vieren ghemarken . een sticke lands heet crucemet leget an + die oostzide . gheile hughe moeronx an + die zuutzide . piet_ wout_s zone an + die westzide ende an + die nortzide . Ende een ghemet lants littel min iof meer ligghende in Coudekerke in + die oostermoer binnen desen vieren ghemarken . Jan moeronc leghet an + die oostzide piet_ wout_s zone an + die zuutzide ic haddeman vornomd ligghe an + die westzide ende die heylighe gheest leghet an + die nortzide . ende ic houde dese ghichte van deser capelrie also langhe als ic leue tote miins selues gheuene . Ende na miin doot so willic Dat ghichters bliuen van deser capelrie . willem zaelden zone . van west_zubburgh . Clays ver + soete hannen zone van welsinghe . ende piet_ wout_s zone van west_zubburgh . ende dat zi dese capelrie gheuen . alse verscijnt also langhe alser enich leuet van hem drien . den ghenen dies wardich es binnen minen gheslachte ende Daghelix messe doet . En_ ware dat zake Dat dese capelrie open ware . ende dese drie ghicht_s niet een~draghtich en waren soe willic so wien datse die twee ghicht_s vors_ gheuen . datse hem bliue zonder yemens wederzegghen . Ende alze dese vorscreuen drie ghicht_s doot sijn . soe willic dat collatoer zi die abt van middelburgh ende ewelike bliue . ende dat dese ghichte gheheeliken ende al an hem sta . ende datse die abt gheue den ghenen dies waerdich es binnen minen gheslachte . Ende die ghene die dese capelrie eerst hebben sal : die willic dat den cost doet van sijns selues goede . van + den outaer te makene voer theilighe cruce . ende te doen wien . ende die _firmacie . ende institucien ende anders dat daer + toe behort . Ende dat hi den ghenen die dit lant ieghens mi verpacht hebben . late ghebruken haren t_miin alvut . also als zi ieghens mi ghesproken hebben ende ghemaect . Jn kennessen der waerheit zoe hebbic haddeman vornomd desen brief zelue beseghelt met minen zeghele . Ende hebbe ghebeden omme die meerer zekerhede . Eersamighe_ lieden ende wisen gheestelike ende waerlike . Heere Janne bi + der ghenaden gods abt van onser vrouwen cloost_ in middelburgh . He_e boudine willems zone van Coudekercke prouisoer ende deken van walgh_en . he_en heynrike he_en hughen miin prochipapen . te west_zubburgh . ende janne jans zone van westerzubburgh miin heerscap . Dat zi Desen brief met mi beseghelen willen met haren zeghelen . Ende o_me die bede van haddemanne vornomt soe hebben wi Jan bi + der ghenaden gods abt van onser vrouwen clooster vorscreuen . boudijn prouisoer ende deken vornomt . Heynric . hughe prochipapen . ende Jan ians zone vornomd . desen brief met haddemanne beseghelt met onsen zeghelen vuthanghende . Dit was ghedaen int iaer ons h_en duzent drie + hondert achte ende viertich . des sondaghes na sente martijns Dach in + den winter - - -