Corpus Van Reenen-Mulder (CRM14): Oorkonde I565r34901

Wi yeman willems zone . jacob hughen zone . wille jans zone . Ende jan symons zone scepene in dumburgh maken cont ende kenlic allen luden dat vor ons cam jan wouter hughen zoens zone van dumburgh Ende ghichtede in rechten eyghendoeme Symoene clays heynen zoens zone den lantmetere tote der capelrien behoef die men v_dienen zal vp sente katelinen outaer in den cloester van middelburgh ander + half ghemet lants lichtelic min of meer ligghende in dumburgh ambocht binnen dezen vieren ghemarken . pieter die cru_me leghet an die oestzide en_ an die zuudside . jan wouters zone vornoemt an die westzide Ende willem wouters zone an die nortside . Ende een ghedinghe als hi met scepenen gheachten mach . Ende jan vorseit ghelouet symone vorseyt dit vorscreuen lant tote der capelrien behoef te waerne tallen rechte Ende recht warent daer of te wesene . jn orconden ende in kennessen der wareyden soe hebben wi . yeman . jacob . wille . Ende jan scepene in dumburgh vornoemt dezen brief bezeghelt met onsen zeghelen wthanghende . Ghegheuen int jaer ons h_en duzent drie + hondert neghene ende viertich des woensdaghes na kersdach - -