Corpus Van Reenen-Mulder (CRM14): Oorkonde I565r35101

Wi willem scengemans sone willem domaes sone Piet_ symons sone / oluuer moers sone / en_ willem piet_ tsmans sone onser lieuer vrouwen der grammen lantscepenen jn walgh_en maken cond allen luden Dat voer ons cam Pieter betten sone en_ versekerde gheerolf iwstaes sone van poppendamme tote der capelrien behoef die Heere doedin piet_s sone vte nortbeuelant ghemaect heuet jn sente annen capelle jn oestdomburgh vier scellinghen groot_ torn_ tsiaers tote eenen eweliken rente alsulc payment als telken t_minen jn bursen valt / te gheldene den ghenen die nv die capelrie heuet / jof die + se hier na hebben sal elcs jaers tote onser vrouwen daghe ter lechtemesse . vord verliede hem piet_ vorseit ware dat zake dat hi dit ghelt niet en gaue elcs jaers toten vorseiden daghe dat gheerolf iwstaes sone vors_ jof die ghene die houder es van desen brieue siin handen slaen mach zonder yemens weder~zegghen an dord + alf ghemet lants ligghende jn een sticke lants van der westzide jn zuutwaerd ouer piet_s vors_ . en_ dat besitten en_ ghebruken jn rechten eyghendome zonder yemens weder~segghen welc vorseide lant gheleghen es bin desen vieren ghemarken pieter betten sone vors_ an + die oostzide . olard lems sone an + die zuutzide . olard piet_ h_en sone . en_ aernout betten sone an + die westzide en_ die herewech an + die nordzide . Vord verliede hem piet_ betten sone vors_ ware dat zake dat hier an yet ghebrake . dat hi dat selue vp~rechten sal zonder enich weder~segghen jn kennessen der waerheit hebben wi scepen_ vors_ desen brief beseghelt met onsen zeghelen dit was ghedaen jnt jaer ons h_en M˚ CCC˚ en_ vichtich vp sente Pontiaens auend