Corpus Van Reenen-Mulder (CRM14): Oorkonde I565r39901

Wy Prouisoor Ende deken van walgh_en . Maken Cond Ende kenlic Allen luden . dat vor ons in + den Rechte ghedaeght hebben gheweest Andries meest_ pieters sone Ende Piet_ alaerds sone van + den abdt van middelburgh of Sine_ p_curatoor om kennessen en_ tughen te zegghen als van vrye dat die abdisse van Reynsburgh haer vermet te hebbene of hebben soude binne_ den p_chyen van Oistcappellen ende Tser~alaerdsk_ke . welke vorseide ghetughen gheexamineerd en_ gheeet zijn om die Rechte waerheyt daer of te zegghene wes zij daer of wisten Jn + den Eersten so es andries meest_ pieters sone voirscr_ wel tsestich jaer out of daer boue_ en_ es landmeter der abdissen vorscr_ en_ wel twintich jaer gheweest heeft ghedaeght en_ gheexamineerd vp sine_ eet die ghetughet dat hi nye en hoorde zegghen dat die abdisse van Reynsburgh vorscr_ Enegherande vry hadde of vermat te hebbene binne_ den p_chie_ vorscr_ anders dan vier + honderd ghemete vrijs in haren Eyghen ambochte en_ in haer eyghen land Ende in anders niements . + ambocht Voird so es pieter alaerds sone vorn_ tsestich jaer out of daer omtrent die een ghebortich man es en_ oic een edel scepene langhe tijt gheweest heeft binne_ den lande van walgh_en wel gheexamineerd vp zine_ eet die ghetughet en_ concordeerd van worde te worde met andriese vorscr_ Jn kennissen der waerheit hebben wi p_uisoor Ende deken vorscr_ desen brief bezeghelt met Onsen zeghele vuthang_ Dit was ghedaen Jnt Jaer ons he_en . M˚ . CCC˚ . neghen ende tneghentich drie ende twintichsten dach Jn Januario -