Corpus Van Reenen-Mulder (CRM14): Oorkonde I581r32801

WJ . Scepenen . burghmeysters en_ raet van + der port in middelburgh orconden en_ maken kont allen luden dat voer ons cam domaes durant ende ordyneerde en_ makede ene capelrie te westmonstere in midd_ ewelike te verdiene ouer zine ziele en_ ouer alle der ghoeder lieden zielen daer hem oyte ghoet of cam en_ tote deser capelrien zoe gheuic domaes twintich pont groter koninx tur_ en_ daer mede rente te copene vppe zeker arve en_ alle dese rente die + me met desen voerseyden ghelde copen zal die willic dat + me gheue ene_ ghoeden man die dese capelrie wel en_ ghetrouwelike verdient en_ hi en zal anders negheen gheestelic ghoet verdienen ende dese capelrie zal + me verdienen na mine doet ende ic beuele en_ make machtich . Ruffin carboen minen neve ende janne hughen sone dese capelrie te gheuene enen ghoeden man daer zi wel an bestaet es en_ waer dat zake dat dese man storuen dat zise enen anderen gheuen in + der mannyere_ als voerscreuen es en_ als dese twe Ruffijn en_ jan doet zijn zoe zal die . . abt van Middelburgh metten scepenen burghmeysters en_ metten Raetsmannen ghifters wesen van deser capelrien in alder mannyeren als voerseyt es Jn orconden en_ in kennissen der wareyden en_ omme~dat alle dese voerscreuene stucken ewelic vast ende ghestade bliuen zullen en_ wel ghehouden en_ omme die bede domaes voers_ hebben wi desen brief ten saken voerseyt ghezeghelt met onsen ghemenen port~zeghele jn + den jare ons heren duzent drie hondert en_ + Acht + ende twintich vp sinte lucas dagh ewangelisten - - -