Corpus Van Reenen-Mulder (CRM14): Oorkonde I581r39901

Andries iacobs sone prochiaen in westmonst_e Cam vor scepenen in middelburgh en_ ghelouede Clays wouters sone recht ware_t te wesene tot allen rechten van zeuen vierendeel ghemeets lands . lichtelike min of meer ligghende ter haymanne bin desen vieren ghemerken . tsgrauen h_ewech an die oostzide . jan tser vranken sone van borselen an die zuudzide . pieter symons sone an die westzide . Ende dieric willems sone an die noordzide . Dat clays vors_ ieghens andriese vorn_ ghecocht heuet Ende andries vors_ verliet hem dies dat Clays vorn_ hem wel betaelt heuet beede den eersten penninc en_ den lesten van desen vorscr_ lande . Hier ou_ waren heynric crabel vranke heynrix sone pauwels piet_ brantins sone boudin ians sone Piet_ martins sone hyldebrant vaenkin witman clays sone Piet_ heynrix sone heynric van abbenbroke heinric ians sone Clays ians sone godeuaert van spreewesteyne en_ michiel van nyewerue scepen_ in middelburgh en_ dit orkonden zij . Dit was ghedaen jnt iaer ons he_en M˚ . + CCC˚ . + neghen en_ tneghentich vpten drie ende twintichsten dach in junio