Corpus Van Reenen-Mulder (CRM14): Oorkonde I587r31201

Allen dien Ghenen die dezen brief zien zullen of horen lezen . JC . Heynric braem prochipape in Reym_swale Make Cont ende kenlich Dat JC al + mijn goet Roerende ende onroerende dat ic hadde binnen die viere hoeken van walgheren vp~ghedraghen hebbe en_ ghegheuen voer scepenen van Middelburgh beudine Sar symoens zone en_ willemme Musschets zone tote miere testamenturen behoef / dat es te verstane mijn here die abt van Middelburgh / Symoen hughekints zone / willem maerlijn Beudijn ende willem voren~ghenoemt . Ende dit vorseide goet zal gaen te eere kapelrien in westmonstre ewelike ghedurende ende staende voren sente marien magdalenen ende sente joose . Ende dese kapelrie soe willic dat heuet viue ende twintich pont zuarter turnoeyse tsiaers of paeyment dat alsoe goet es van desen vorseiden goede . Ende dit goet vorseit van + der kapelrien vorseit heb ic gheleyt en_ ghegheuen puurlike ome gode en_ in verlatenessen van allen mine_ zonden mijns vader miere moed_ en_ haer alre daer ic Oeyte goet of ghecrech vppe tardendeel van + den steenhuze / daer ic zelue nv in woene / dat mijns vader ende miere moeder was ende mi bestoruen es van hemlieden . En_ vp thuus ende hofstede an die nortzide daer an alrenaest dat nu mijn es . En_ vp een ghemet lants dat ic heynric braem priester vorseit cochte ieghens Gillis willems zoens kinder dat + men heet tbrigghemeedekijn . Ende vppe twe ghemete lants die mi bestorfuen van vadre en_ van moedre ligghende daer an vppe die veste an die zuutzide van + der port / en_ tnortste van dezen twe ghemeten dat heet men mede tbrigghemeedekijn . Ende daer bi soe willic soe wie die dese kapelrie heuet dat hi hem zeluen ornament / wijn / hostien / ende enen kelic hem zeluen berecht . Ende van desen viue en_ twintich ponden vorseit zoe zalre ofgaen een pont zuarter tur_ of paeyment alse hier vorscreuen staet / elkes iaers ewelike ghedurende mijns zelues iaerghetide mede te doene . en_ vppe den dach als + men mijn iaerghetide sculdich es te doene soe willic dat + men mijns vader iaerghetide en_ miere moeder / + doe en_ haer alre daer ic oeyte goet of ghehat hebbe . Vort soe willic soe wie die dese kapelrie heuet dat hi alle iare dese vorscreuen iaerghetide doe alsoe alse hier vorscreuen es . Vort soe willich dat hi cope elkes iaers twe pont was . een pont te vigelien kaersen . en_ tander pont tofferlecte . Vort soe wat priester die in westmonstre gheprouent es . ende auentijt es te vigelien / ende nuchtentijts ene zielemesse doet in dese vorseide kercke die willic dat heuet twelf penninghe zwarter tur_ en_ daer bi soe willic dat zi ghedincken openbare in hare messen miere zielen mijns vader miere moeder en_ haerre alre zielen daer ic oeyte goet of ghecrech of ghehadt hebbe . Ende Camen zi te vighelien niet no ghene messen en daden soe willic hem niet ghegheuen hebben . en_ dit beuele ic dien ghenen die dese kapelrie heuet te verwaerne in zine ziele . Vort soe zal hebben die de kapelrie heuet twe scellinghe voren zine pine / die scolemeest_ omme bedinghe / twe scellinghe van zine kinder . den Costre twelf penninghe / en_ dat hier bouen bliuet dat zal + men deelen den armen ome gode . Vort soe wat dat bouen desen vorseiden viue ende twintich ponden bliuet van al + mine_ goede . dat willic dat + mer mede ghelt mijn testame_t mijn onrecht en_ mine scult of hiemene quame met witachtighen orconden dat + ment hem daer of ghelt . Vort soe es mijn wille ende mijn vterste begherte / dat ic dese kapelrie vorseit alte~handen gheue puurlike omme gode ende in rechter alemoesene Claeyse beudijn s_ symoens zoens zone die nv ter scole gaet te zinen liue toe . Ende dese kapelrie ne zal + men niet besinghen alsoe langhe als ic leue . hen zi bi mine_ eyghin wille . Ende na Claeis doot vorseit die ic dese kapelrie ghegheuen hebbe eist dat zake dat ict beleue soe willic zelue die ghicte behouden alsoe langhe als ic leue in mi zeluen te gheuene daer ic wille en_ mi goed dinct . En_ vort na minen leuene / en_ na Claeis doot vorseit soe set + ic die ghifte en_ gheue ewelike van deser vorseider kapelrien te gheuene minen here den abt van Midd_ enen goeden waerliken manne die priester es daer hem dinct dat soe wel bestaet es met gode . Ende ome~dat ic wille dat dese dinghen / ewelike vast en_ ghestade bliuen / soe heb + ic desen brief bezeghelt met mijns selues zeghele vuthanghende . Ende hebbe ghebeden / en_ bidde / Eerzamighen lieden / Gheesteliken en_ leeken / mijn here den abt van Midd_ . den Gaerdiaen van + der zeluer stede / den prior van den augustinen in Midd_ . den deken en_ den prouisor van walgheren / en_ scepenen van Midd_ . Domase s_ hughen lieuen zone / Meeuse s_ weytijns zone / willem hughen zone van + den kerchoue heynric die Reysere / Lieue ian / pieter pieter willen zoens zone / heynric braem Claeis zone / ende jan heynrix zone / dat zi desen brief bezeghelen willen met mi . Jn orconden in kennessen en_ omme de meere zekerheden en_ der bede sar heynric braems vorseit . soe hebben wi abt . Gardiaen / prior / deken ende p_uisor (onleesbaar) (onleesbaar) wi scepenen voren~ghenoemt dezen brief bezeghelt hieghelich met zinen zeghele vuthanghende . Dit was ghedaen int iaer ons heren als (onleesbaar) (onleesbaar) ?ent / + drie hondert / + en_ twelfue / vppe sente andries auent - - -