Corpus Van Reenen-Mulder (CRM14): Oorkonde I587r31202

Allen dien Ghenen die desen brief zien zullen of horen lesen . JC . . Heynric braem prochipape in Reym_swale Make Cont en_ kenlich Dat ic al + mijn goet Roerende ende onroerende dat ic hadde binnen die viere hoeken van walgheren / vp~ghedraghen hebbe ende ghegheuen voer scepenen van Midd_ Beudine Sar symoens zone en_ willemme Musschets zone tote miere testamenture_ behoef / dat es te verstane mijn here die abt van Midd_ / Symoen hughekints zone / willem Maerlijn beudijn ende willem vorenghenoemt . En_ dit vorseide goet zal gaen te eere kapelrien in westmonstre ewelike ghedurende ende staende voren sente Marien magdalene_ ende sente ioose . Ende dese kapelrie soe willic dat heuet viue ende twintich pont zuarter tur_ tsiaers of paeyment dat alsoe goet es van desen vorseiden goede . Ende dit goet vorseit van + der kapelrien vorseit heb + ic gheleyt en_ ghegheuen puurlike ome gode en_ in verlatenessen van allen mine_ zonden mijns vader miere moed_ en_ haer alre daer ic Oeyte goet of ghecrech vppe tardendeel van + den steenhuse / daer ic zelue nv in woene / dat mijns vader ende miere moeder was ende mi bestoruen es van hem~lieden . En_ vp thuus ende hofstede an die nortzide daer an alrenaest dat nv mijn es . En_ vp een ghemet lants dat ic heynric braem priester vorseit cochte ieghens Gillis willems zoens kinder dat + men heet tbrigghemeedekijn . Ende vppe twe ghemete lants die mi bestorfuen van vadre en_ van moedre ligghende daer an vppe die veste an die zuutzide van + der port / en_ tnortste van dezen twe ghemeten dat heet men mede tbrigghemeedekijn . Ende daer bi soe willic soe wie die dese kapelrie heuet dat hi hem zeluen ornament wijn / hostien ende enen kelic hem zeluen berecht / Ende van desen viue en_ twintich ponden vorseit soe zalre of~gaen een pont zuarter tur_ of paeyment alse hier vorscreuen staet elkes iaers ewelike ghedurende mijns selues iaerghetide mede te doene / en_ vppe den dach als + men mijn iaerghetide sculdich es te doene / soe willic dat + men mijns vader iaerghetide en_ miere moeder doe / en_ haer alre daer ic Oeyte goet of ghehadt hebbe . Vort soe willic soe wie die dese kapelrie heuet dat hi alle iare dese vorscreuen iaerghetide doe alsoe alse hier vorscreuen es . Vort soe willich dat hi Cope elkes iaers twe pont was / een pont te vigelien kaersen / ende tand_ pont tofferlecte . Vort soe wat priester die in westmonster gheprouent es . ende auentijts es te vigelien en_ nuchtentijts ene zielemesse doet in dese vorseide kercke die willic dat heuet twelf penninghe zwarter tur_ / en_ daer bi soe willic dat zi ghedincken openbare in hare messen miere zielen mijns vader miere moeder / en_ haerre alre zielen daer ic Oeyte goet of ghecrecht of ghehat hebbe . Ende Camen zi te vighelien niet no ghene messen en daden soe willic hem niet ghegheuen hebben / Ende dit beuele ic dien ghenen die dese Capelrie heuet te verwaerne in zine ziele . Vort soe zal hebben die dese kapelrie heuet twe schellinghe voren zine aerbeit . die scolemeester omme bedinghe twe schellinghe van zine kind_ . die Costre twelf penninghe / en_ dat hier bouen bliuet dat zal + men deelen den armen ome gode . Vort soe wat dat bouen desen vorseiden viue ende twintich ponden bliuet van al + mine_ goede dat willic dat + mer mede ghelt mijn testament mijn onrecht en_ mine scult of hiemene quame met witachtighen orconden dat + ment hem daer of ghelt . Vort soe es mijn wille ende mijn vterste begherte dat ic dese kapelrie vorseit alte~hant gheue puurlike ome gode en_ in rechter alemoesene . Claeise beudijn Sar symoens zoens zone die nv ter scole gaet te zinen liue toe . Ende dese kapelrie ne zal + men niet besinghen alsoe langhe als ic leue / hen zi bi mine_ eyghin wille / Ende na Claeis doot vorseit die ic dese kapelrie ghegheuen hebbe eist dat zake dat ict beleue soe willic zelue die ghifte behouden alsoe langhe als ic leue in mi zeluen te gheuene en_ mi goed dinct daer ic wille . Ende vort na mine_ leuene en_ na Claeis doot vorseit soe set + ic die ghifte en_ gheue ewelike van deser vorseider kapelrien te gheuene mine_ here dien abt van Midd_ enen goeden waerliken man die priester es daer hem dinct dat soe wel bestaet es met gode . Ende ome~dat ic wille dat dese dinghen ewelike vast en_ ghestade bliuen soe heb + ic desen brief bezeghelt met mijns zelues zeghele vuthanghende . Ende hebbe ghebeden / en_ bidde eerzamighen lieden / en_ / + wisen Scepenen / burghermeysters ende den ghemeenen raet van Middelburgh / dat zi desen brief bezeghelen willen met haren ghemeenre port~zeghele / Ende ome die meerre zekerheden en_ der bede S_ heynric braems vorseit / soe hebben wi scepenen / burghermeyst_s / en_ Raet vorseit dezen brief bezeghelt met onsen ghemeenen port~zeghele vuthanghende . Jn die iare ons heren / duzent + / drie hondert / + ende twelfue / des zaterdaghes na sente andries dach . - - -