Corpus Van Reenen-Mulder (CRM14): Oorkonde I587r32001

Wi diederic boudins zone prochipape van Scoetelinckerke . Rase s_en gillis zone van koudekerke . Jan en_ pieter . pieters kindere van west_subburgh . Gillis en_ wulf hughekints kind_e van riethem . Manne des abts van middelburgh . Orconden en_ maken cont allen den ghene_ die dezen brief zullen zien of horen lezen . dat vor ons quamen Scuweloef heinemants van scoetelinckerke . heyneman . en_ clais zine kind_e . en_ droeghen vp den abt van middelburgh en_ zinen conuente . in rechten eyghindome Sonder eynich . + si al den tiende die zi helden van den abt vorseit . en_ gheleghen es in scoetelinckerke in nortbeuelant . vri . en_ clakelooes althants vp te comene . en_ in den gront ewelike te hebbene Sonder enigherhande arghlist . en_ van dezen vornomden tiende zo verlied zi hem Ssuweloe en_ zine kind_e vorenghenomd . dat hem die abt en_ zijn conuent vorseit . wel betaelt . en_ al verghouden hadde beede den eersten pennich en_ den achtersten . en_ omme~dat wi prochipape . en_ Manne vorenghenomd hier ouer waren . So hebben wi in kennissen der wareyden dezen brief bezeghelt yeghelijc met onzen zeghele wthanghende . dit was ghedaen in die iaer van ons h_en gheborte . M˚ + . drie + hondert + . en_ twintich sinte gregorius auende in die maent van marte .