Corpus Van Reenen-Mulder (CRM14): Oorkonde I587r32601

Wj willem van campen . jan pieters zone van westerzubburgh . wente van brigdamme . ende heinric willem heeren zone Manne des Abts vam middelburgh orkonden ende maken kond allen lieden met desen brieue / Dat vor ons quam berwoud pieters zone van nordbeueland / ende droech vp den abt van middelburgh ende zinen Conuent jn rechten eeghindoeme zonder enich tsi / al den tiende jn grutersdijc die hem van zinen vader ancomen was / ende hi helt van den Abt vorseit / vri ende clackeloes althants vp + te + comene zonder enigherhande arghlist / Ende van desen vornoemden tiende verliede hem berwoud pieters zone vorseit / dat hem die Abt vorseit wel betaelt ende al verghouden heuet beede den eersten penninc ende den lesten . Ende omme~dat wj / willem / jan / wente / ende heinric / Manne des Abts vorseit hier ouer waren zo hebben wj jn orkonden ende in kennessen der wareit desen brief beseghelt met onsen zeghelen vuthanghende . Dit was ghedaen jnt jaer ons h_en . dusent + . drie + hondert + . ende zesse ende twintich . des zaterdaghes na sente jans dach baptisten jn middenzomere - - - - -